Posts tagged “gemis

Licht

in de schare
van n stoatege boom
staait n baank
van nait vergeten
woarop zitten goan n zunde is

n sereen stee
van stil herdenken
woar troanen valen
soms verdrongen
om reden van t gemis

tastboare symbolen
van veul herinnerns
liggen vredeg
as n kompozietsie
in n verhoal of gedicht

swaarde letters
weerstoan weer en wind
trotseren emootsies
om te vertellen
rond schare is der licht

eltje ©

Gemis

image

t binnen de troanen
dij mor nait valen
t is t stoeken van
stil verdrait

t binnen gedachten
dij smaart vermoalen
t is t verwaarken
van ainzoamhaid

t binnen de woorden
in stilte sproken
t is de leegte
dij ik besef

t binnen de vroagen
aal onbeantwoord
t is in t gemis
dat ik die tref

eltje ©

Leegte

Leegte

tiedens de raais
vol toukomstdreumen
brekt de hel
haardvochteg in

ale plannen
veur nou en loater
hebben in t duvelsbos
gain zin

tussen geleuf
en nait geleuven
stridt vaals licht
mit duusternis

tussen begun
en ìndloos droagen
smaart de last
van groot gemis

eltje ©

%d bloggers liken dit: