Posts tagged “gedrag

Kopschraberijen – grunnegs

“Pratst ook Grunnegs mien wicht?” Op weg noar de deure keek zai achterom. “Wat zegt u meneer?” “Ofst ook Grunnegs pratst.” De sollisitante keek mie hulpeloos aan en om heur uut heur lieden te verlözzen zee ik: “Je spreekt zeker geen Gronings.” Nee,” zee ze verontschuldegend, “Mijn ouders wel, maar ze hebben het me nooit geleerd.”


Op t mement dat je dit lezen zit je meschain wel mit n kop kovvie veur joe, mit op joen schuddeltje n dikke hombe kouke mit derop n dikke loage botter. Of ie beheuren wellicht tot de lu dij zokzulf op alle mementen van de dag te kört doun, omreden joen liggoam en gaist mouten voldoun aan, deur rekloamemoakers veurgeschreven ideoalen.

Der wordt tegenwoordeg swoar inzet op pokkelgewicht en wangkwabben. Manlu dij heur aigen veurtplantensraive nait meer zain kinnen binnen potentiëel lopende doodskisten en kosten de soamenleven op termien handenvol geld. Veul vraauwlu stonden net zo in t leven.

Stonden der bie mie in toene vrouger n stók of wat bonestokken mit waalze bonen, tegenwoordeg flaneren bonestokken op social media: aalmoal strinten dij zo lek binnen as n teemze deur aal heur pokkelschroot. Ongezonde verschienens op twij bainen. Om aan ideoalbeelden te voldoun ontzeggen ze zich van alles en nog wat.

Ontzeggen betaikent dat je joezulf wat verbaiden, dat je joe ontholden van. En ehh…..: dat geldt ook veur t Grunnegs!

Buurman Jan – smoesie

“Kovvie en kouke? Zugst ter ja uut ofst zo tegen de vlakte gaaist. Bist lebait?” Buurman Jan haar zok mit n plof dele valen loaten op stoule aan de keukentoavel.

“Proat mie der nait van,” kremenaaierde hai. “Ik bin net zo gammel as t òfdakje van Appie Tammengoa zien holten schuurtje. Man, k vuil mie net zo deurzichteg as n ondermoatse gernoat.”

“Zo, dat is nait bèst. Hou komt dat?” vruig ik.

“Mien Griet het zok n blendertje aanschaft. Zo’n hakselvertuut woar je alles vanboven in mietern kinnen en wat ter vanondern as smurrie weer uutkomt. Zai was noamelk van mainen dat heur omvang wat tounomen was. Zai wol doarom op diëet en kwam tot de konkluzie dat ter zo’n snibbelmonster heer mos. Zai haar lezen dat joen daarms der mit n poar gloazen van dat sap per dag n voldoan gevuil van kregen.

Ik zee nog: begun doar nait aan, Griet. Bist gaauw zat van t schoonmoaken van zo’n mesien, omreden doar zitten meer onderdailen aan as aan mien fietse. Dat ding belandt noa n week of wat op beune achter t schot. Mor ja, wat mien Griet in de kop het wordt in de mainste gevallen zichtboar. En dus staait Hakselpot, want zo heb k dat kreng nuimd, bie ons op t aanrechtblad.

Mor dat is t slimste nait. Mien Griet von dat dij prutmoaker ook meroakels geschikt veur mie was. Kinst die t veurstellen? n Haile weke elke dag gemoalen slabbe hap deur d’haals. Man, ik kin mien gebit wel inruilen, kaauwen is der nait meer bie. t Was elke dag zoegen en nog ais zoegen. Wie hebben d’haile weke niks aans had as dunne puree. Ze nuimen dat smoesies. Nou, d’ainege varioatsie zat m in de volgorde van hou je d’ingrediënten der boven in smeten. De smoak was aal geliek.”

“Ik heb heurd dat je ook smoothies moaken kinnen mit n wat dikkere struktuur. Din mout je melk of yoghurt touvougen,” perbaaierde ik.

“Hol mie der mor over op. As ik bie ons de keuken in loop en ik zai Hakselpot stoan din heb k al eten en dronken. Ik kin dat misbaksel wel vergraimen. Hest nog wat kouke over? Din wil k wel n poar hompkes mithebben. Din kin k dij stiekem opeten.”

Ik snee buurman Jan n poar beste hompen òf en dij ging aal koukhappend op huus aan. Waitende dat de reuk van kouke aan joen handen zitten gaait was k benijd mit wat veur smoesie hai thuuskommen zol…….

%d bloggers liken dit: