Posts tagged “gedrag

Buurman Jan – lulleg

“Hest t ook lezen? Over dij man in Spanje dij zokzulf deur zien snikkel schoten het? Volgens mie kin dij t wel schudden om ooit nog as n Don Juan deur t leven te goan. Man, hou dom kin je wezen.”

Buurman Jan zat nog mor net of hai stak al van wale. “Kovvie?” vruig ik en schonk intied al zien kopke vol.

“Geern,” zee buurman Jan. “n Goie kop kovvie op de vrouge mörgen dut wondern. Traauwens, ik was lèstdoags aan t goegeln en dou las ik wat over t dunning-kruger effect. Dunning en Kruger kregen in t joar 2000 de Nobelpries veur psychologie. Om n laank verhoal kört te moaken: ze kwamen tot de konkluzie dat domme lu heur prestoatsies hoger inschatten as dat dij in waarkelkhaid binnen. Mor deur heur aigen domhaid binnen ze nait in stoat om heur verkeerde keuzes in te schatten. Körtom: domkoppen lopen van domhaid over van zulfverzekerdhaid. Desondanks zai je ze wel voak in veuraanstoande pozietsies. Veurbeelden zat, ja.”

“t Is wat,” zee ik. “Mor ja, t voutvolk loat ook ja veul te voak over zok hìnlopen, nee din?”

“Krek,” zee buurman Jan. “Kiek, dat overschatten van zokzulf komt veuraal in ‘hogere kringen’ veur. En omdat heur ondergeschikten bange binnen veur heur aigen pozietsie zeggen ze der niks van. Nee, t is slecht stèld mit de medemìns. d’Angst om te overleven zit ter goud in. En dat wordt ter tegenwoordeg al op jonge leeftied instampt. Wat dochst van aal dij lutje beudels dij liggend in de waige treust worden omdat heur olders zeggen dat heur toukomst der nait rooskleureg uutzugt en dat heur lèste uren sloagen hebben.

Mor goud, dit perbleem löst zok vanzulf op. Der kommen aal minder noazoaten, omreden t mannelk geslacht schient aal minder nuttegs te produseren. De vruchtboarhaid van de man bliekt mit ongeveer ain persìnt per joar òf te nemen. Tja, ik kin mie veurstellen dat dit veur lu dij zokzulf overschatten n dikke desepsie is. n Lul wordt op dizze menaaier n nul. Mor kom, ik stap weer noar mien aigen schat, mien Griet. En al zeg k t zulf: dij stap mout je nait onderschatten. Tjeu.”

Buurman Jan ging op huus aan. Òf en tou haar ook hai wat last van t dunning-kruger effect. Ach, zolaank hai zok mor nait in zien aigen raive schut.

Dat zol ja slim lulleg wezen….

Buurman Jan – licht

“Moi, kovvie kloar? Hest t licht nog aan ja. Denkst wel om dien stroomreken?” Buurman Jan meldde zok veur zien wekelkse kop kovvie.

“Tja”, zee ik, “in de tied dat de doagen körten en de nachten lengen mout ik ja wel even gebruuk moaken van kunstlicht om die onder t inschenken van dien kovvie recht in d’ogen kieken te kinnen,” zee ik.

“Dat is woar,” zee buurman Jan. “Mor dat gaait nait aaltied op. t Ligt ter mor aan of je mekoar t licht wel of nait in d’ogen gunnen. n Oplichter het bie mie gain krediet. En as k mien licht schienen loaten over n lichtmis din zit k laiver in t duustern.”

“Och, je mouten op zien tied wel wat lichten en swoaren kinnen,” zee ik.

“Mor nou wie t toch over “licht” hebben ja, ik heb lezen dat lu vrouger de noageboorte van n kou of n peerd ook “t licht” nuimden,” zee buurman Jan. “Dat hongen boeren boven in n boom omdat ze leufden dat t din mit heur jonkvee aal goud kommen zol. En as t dreuge was wuir t bruukt as wondplaaister.”

“Nou, dat is nij veur mie,” zee ik. “k Heb wel ais heurd dat je licht in de duusternis brengen kinnen. Net as n fietslanteern, as dij teminnend licht geft.”

“Zeg dat wel,” reageerde buurman Jan. “k Wil de lu nait geern de kost geven dij zunder licht rieden. Van dij lichtmizzen dij verwachten dat n aander heur in t duustern wel even bielichten zal. Mor ja, wèl ligt doar tegenwoordeg nou nog wakker van. Alhouwel, wie mouten der ook weer nait te lichtzinneg over wezen, want der wil toch gain aine n lanteernpoale zunder licht wezen. Kom, ik goa weer noar mien licht, mien Griet. Even kieken of ze vandoage ook licht aanbraand is. Tjeu!”

Buurman Jan ging op huus aan. Hai haar op zien menaaier weer zien licht schienen loaten over zien leefwereld. Der was licht zat, mor ook veul duusternis.

En dat mout je nait te licht opvatten…..

Buurman Jan – wolf

“Kovvie?”

“Tuurlek”, zee buurman Jan, “en as t kin mit n dikke snee kouke.”

“Nou, ik heb dit moal zulfgemoakte povvert veur die,” bood ik hom aan. “Bakt noar mien òl opoes resept,”

“Doar spij ik nait op,” zee buurman Jan. “Lekker man. Dat vaalt ter vast goud in noa n weke van niks aans as ellìnde. Der waren weer hail wat wolven in schoapsklaaier in de weer om ons laand onvaaileg te moaken.”

“t Kon inderdoad weer nait op,” beoamde ik.

“Nou wie t over wolven hebben, ja: wat veur wild dulden wie ainglieks in ons laand en houveul?” zee buurman Jan. “Wat is ainglieks reëeel in n laand mit 18 miljoun twijbainers. t Is toch bie de wilde knorhoanen òf as je joen hounder, schoapen, pony’s en vee achter hoge hekken en òfrasterns votstoppen mouten omdat dagdreumers deursloagen binnen. k Wor dörms van aal t getjaauwel over hou geweldeg t wel is dat ter wolven deur ons laand dolen. Nog even en wie kriegen t zulfde kaberet mit de lynx. Dij schient ook al onze kaande op te kommen.

k Wil nait veul zeggen, mor ons laand wordt aal meer n diktatuur van minderheden dij heur denkbeelden over heur hobby’s opdringen as d’ainege woarheden. Elke dag binnen der verongeliekte drammers bie t pad dij mit veul overlast aandern heur wil opleggen willen. Ik zeg die dit: Nederland is nait inricht veur dat soort ongelimiteerde fratsen.

En ze vergeten ain soort: heur aigen. Dat is de grootste veroorzoaker van de perblemen. Boetendes is t gezond verstand in heur kringen aal meer aan slietoage onderheveg. Ik zeg die dit: heur I.Q. lopt qua meugelkheden nait parallel aan d’ontwikkelns in onze tied. t Wordt hier doardeur aal meer n wildeboudel. t Duurt nait laank meer of ze stèllen wolven aan as schoapherders.

Kom, ik goa weer noar mien Griet. Even snakken over dien lekkere povvert. Mien Griet kinnende wil zai dien bakkunst overtrevven. k Zal nait tegen sputtern. Ik bring die wel n hompie. Tjeu!”

Buurman Jan ging op huus aan. Ik docht nog even noa over zien reloas. Der zat wat in. t Liekt ter inderdoad op dat de bere in ons laand lös is.

En dat nait bloots in en rond Hongerge Wolf……

%d bloggers liken dit: