Posts tagged “erotiek

Vibrator

De vibrator schient n gewild objekt te wezen. t Dagblad vermeldde noamelk dat d’oavendklokke hail wat van dij vertuten tot trillen brocht het. n Erotiekgigant uut Veendam het ter goaren bie sponnen.

Vot noa t ingoan van d’oavendklokke vloog d’omzet van de seksvertuten stail omhoog. Wel toupazzelk netuurlek, omreden sommege erotische produkten binnen bedould om t spultje in de locht te kriegen of te holden. Meschain omdat t mit n reloatsie net is as mit n swien slachten: t het zien uutvaal. En ìnkeld mor zitten te trillebillen verveelt ook ja op n duur.

Ain van de mainst gewilde produkten is de vibrator. Mor ook de vibrerende aaichies gingen as broodjes over de teunbaanke. Boetendes waren de trilvertuten op òfstand slim in trek. k Heb heurd dat ter zulfs gounent binnen dij je mit n sneltoetskombinoatsie op joen toetsenbord aanzetten kinnen. Dat is spesioal ontworpen veur op kantoor, veur de mementen dat je even inkakken. Of dizze techniek ook toupaasd is in masturbators, cockringen en buttpluggen is mie nait bekìnd.

Omdat aal meer lu in binnen veur trillalla-hopsassa is d’omzet gigantisch stegen. De drumpel om lol- en hulpstokken aan te schavven wordt bliekboar aal leger. Traauwens noast de trillerij is der ook veul animo veur gleerderij. Lu binnen bliekboar slim in de verlaaiden kommen noa aal dat handen wassen en smeren der nou ook op intieme mementen lusteg op lös.

Wat zeggen ie? Ie wassen joen handen in onschuld?

Och, der binnen ook seksspeultjes spesioal veur christenen…….

%d bloggers liken dit: