in t daipste innerlek
van onz’emootsies
bruien gevuilens
van t swaartste kwoad
blieven behuiften
laank onvervuld din
zuiken ze wegen
vol verzengende hoat
haarten blouden din
smereg smaartend
en laaiden tot n
wizze hazzendood
mor
in tieden van
doezenden angsten
kleuren koaken voak nait
van schoamte rood
eltje ©
d’eerste smok
t eerste doetje
d’eerste laifde
vol vlinders in t lief
aal eerste moalen
mit intense emootsies
mit nait t gevuil van
vluchteg tiedverdrief
mor tied vervlogt
mit de joaren aal vlogger
want leeftied
bepoalt olderdom
zo weegt op n duur
dij waitenschop swoarder
en ervoart nait elk t
as levensriekdom
toch het older worden
ook hail veul veurdailen
vergriezen is nait bloots
n indikator van verval
veul huft nait meer
woar j’ooit noar verlangden
beschaauw doarom leeftied
gewoon as n abstrakt getal
eltje ©
n bont palet
wekt wizzelnde assosioatsies
vol herinnerns in rezoluutsies
van leeg tot hoog
n gekleurde bril
beïnvloudt t oordailen en
is schoadelk en funest
veur n dialoog
mainens worden kleurd
in doun en loaten
mor kleuren zulf
veroordailen nait
tinten binnen blind
zo nait d’emootsies
dij de mìns zulf inkleurt
tot aandermans verdrait
eltje ©
berustend stoarend
in n leegte
van lange gangen
drokt t licht swoar
op t gevuil
van ainzoamhaid
berre schoft
onder plafondploaten
deur noar n zee
van licht en donker
en duustere emootsies
vol onzekerhaid
eltje ©
KOPSCHRABERIJEN 