waarkzekerhaid
is uut den boze
vrije doagen binnen taboe
oldern worden
as last ervoaren en
de regelgeven is n ratjetoe
rechten transformeren
in plichten soms in
waarkverschafmodellen
managers kreëren loagen
om aigen pozietsies
zeker te stellen
de vrije maarkt zol n
zegen wezen veur n
florerende ekonomie
nou wordt de middenklazze
verzwolgen en dat is
funest veur de kohezie
eltje ©
d’ekonomie
stagneert omdat
de koopkracht
aal meer inzakt
t is dudelk
dat de krisis
nou ook de
middenklazze rakt
eltje ©
in n woanzinnege
wereld worden lu plet
tot geestelke en
liggoamelke wrakken
onder drok van
ekonomische grui is
de weerstand doaneg
aan t verzwakken
getallen worden bruukt
en manipuleerd om zin en
onzin aan te geven
mor
t ontbrekt dudelk aan
sievers veur gelok en
kwaliteit van leven
eltje ©
veul
staait ter
onder drok en
nog meer
wordt ter deur
t geutgat spuild
zo stoadegaan
wonen lu
in n laand
woar elk zich
slachtovver vuilt
eltje ©
as kabinetsmoatregeln
gain pluzzen mor
bloots minnen vertonen
zit je as laand
mit de brokken
vanwege wantraauwen
en onzekerheden
stagneren uutgoavepetronen
en blift kaptoal aan
d’ekonomie onttrokken
eltje ©
op de goie weg
is spektakulair sproake
van drok verkeer
woar gunstege gruisievers en
aandailholders mekoar
inhoalen en verdringen
op alle kruuspunten
kriegen ze veurrang
en stoan investerenslichten
op gruin omdat pozitieve
prognozes van winst
en grui rondzingen
aan de kaant
stoan roadeloos
en riddersloagen lu
dij depressief worden
bie t aanschaauwen
van dizze euforie
veur t rooie licht
van waarkgelegenhaid
staait n gruiende
waarkloze massa dij
zunder toukomstperspektief
beheurt tot de restkategorie
eltje ©
KOPSCHRABERIJEN 