Lestdoags las k dat de PvdD n nije gedragskode invoerd het. Politisie en bestuursleden van dizze daaiernpartij maggen, as ze in funksie binnen en zai zok onder t volk begeven, gain daaierleke produkten meer eten. Dat is volgens de partijbobo’s in stried mit heur veurbeeldrol.

Zo’n veurgeschreven veurbeeldrol (let op: lees nait “drol”) holdt dus in dat je joe thuus wel ongans eten maggen in knakworsten, blinde vinken en wìntelteefkes. Rolloades en kabbenoades mag je in joen aigen huus ook deur de sloekerd joagen. En wil je 5 blikken Smac opkaauwen is dat ook prima. Je huiven ook nait aan te geven of je dat in plakken of in dobbeltjes noar binnen waarkt hebben.

Kiek, as ze nou besloten haren dat ze onder t dikkedakken in n restaurant de boksem nait zakken loaten maggen, din haar k dat nog wel begriepen kind. Zokswat dou je in huus en doarover kin je zulf beslizzen. Doar hejje gain toustemmen van t partijbestuur veur neudeg. Mor as je zokswat in openboare ruumtes doun zollen, zol je n grode kans hebben dat joen tokus pontifikoal op n veurblad verschienen zol. En je waiten: as ze joe ainmoal bie de kont hebben din hebben ze joe ook al gaauw bie de kop. En dat is netuurlek slim schoadelk veur t imago van de partij.

Hou din ook, in wezen komt t ter op dele dat lu zok in t openboar beter veurdoun mouten as dat ze zok thuus gedroagen maggen. Doar kinnen ze schoamteloos de kulinaire baist uuthangen. Ze hebben as t woare thuus n boksem aan, mor droagen in t openboar n pantalon. En dat aal veur t oog van t Neerlands volk, mor netuurlek ook om te snakken vanzulf. t Is in wezen ainglieks n haalf-om-haalf veurbeeldrol. k Wil nait veul zeggen, mor volgens mie is t n snakrol. Je zollen der gehak van moaken.

Zol dat soort volk heur aigen noageslacht nou ook heur “vlaais en bloud” nuimen? Of zal heur lutje potje “n noazoat” wezen. t Woord “noazoad” borrelt din vanzulf ook noar boven.

Nou ja, de boksem zakt mie dervan òf.

Traauwens: zal der ook veurzoad wezen……?