Posts tagged “data

Gloeperij

Wie leven in n tied dat aal meer van ons doun en loaten aal minder privé wordt. t Aantal instansies dat zo stoadegaan alles van ons wait, gruit mit de dag. Onder t mom van “vaaileghaid en gemak” wordt de privacy makkelk verkwanzeld.

Wie kieken nait vrumd meer op van t faait dat ter in veul winkels en op alle houken en hörns van stroaten en spelonken kamera’s hangen. Op dizze wieze kin Jan Rap en zien moat beter in de goaten holden worden. En dat verhoogt “netuurlek” elks vaaileghaidsgevuil.

Lu kommuniseren op òfstand ook al mit heur thermostoat, koulkaast en kovviezetter. Dat doun ze ten behuive van n betere kwaliteit van leven en wonen. Tenminste, dat willen vertegenwoordegers van allerhaande apperoaten ons leuven loaten. Net as informoatikoa, robotikoa en telemoatikoa mout domotikoa de gewoonste zoak van de wereld worden.

Mien ol opoe zee vrouger: “Alles wat ik dou, is privé en dat gaait van mien aanrecht tot in de plee.” t Ol mìns zol de schrik van heur leven kregen hebben as zai in t overdekte winkelsentrum opains uut de luudsprekers heurd haar: “De dildo die uw man twee jaar geleden bij de Wehkamp heeft besteld is hoogstwaarschijnlijk aan vervanging toe. U vindt de nieuwste modellen bij ons op de afdeling handege apperatuur op de tweede etage, pal naast de strijkijzers en de robotstofzuigers. Bij ons krijgt u er gratis ook nog 2 doosjes condooms bij.”

Nee, in heur tied huil t blikveld van d’haile buurt op bie elk zien of heur veur- en achterdeur mit hooguut even wat gloeperij over d’hege.

De Nederlandse opsporens- en inlichtensdainst is ook drok dounde om tougang te kriegen tot de versleudelde berichtendainsten van biev. WhatsApp en Telegram. t Snuvveln in gekodeerde berichten ligt gevuileg, mor veul lu binnen geern beraaid om heur privacy minder swoar wegen te loaten as de nationoale vaaileghaid.

Big Brother krigt stoadegaan aal mee vörm.
Der binnen landen woar ze der ook al n gezicht bie hebben………

eltje ©

Datamaffia

Door grenswaarden bewust te laten dalen komen er overnacht zomaar patiënten bij en/of behoor je plotseling tot een risicogroep. De farma-industrie weet er wel raad mee. Maar ook bijv. door de industrieconcerns en de verzekeringenbranche worden we al jarenlang misleid. En wat te denken van de anti-pensioenlobby………

Datamaffia

Netneutraliteit

Netneutraliteit
internetproviders
vergroten heur macht
en verspraaiden heur tentoakels aal meer

zoakelke belangen
goan doarbie boven t recht
van t geliek behandeln van dataverkeer

internetmagnoaten
bepoalen de tougang en
snelhaid is nait meer garandeerd

infermoatsieveurzainen
is in t geding en
der wordt ongemaarkt manipuleerd

d’elite profiteert
van de veurrangsregels
veur de kwaliteit van streams t mainst

d’ontstoane twijdailen
brengt tougankelkhaid in gevoar
van n tot dusver vrij openboare dainst

eltje ©

ING en kozotten

ING
d’òfhankelke reloatsies
tussen banken en klanten
moakt d’eersten
verre van goudgeefs

de big data
van de konsumenten
is t nije gold
in heur digitoale safes

mit branchevrumde
aktiviteiten willen ze
op hellende vlakken
klantgegevens vermaarkten

mor t zol veur de klanten
veul beter wezen
as ze zich tot d’aigen
primaire toaken bepaarkten

eltje ©

Chipt

Chipt
aal meer
van t leven
wordt stiekem registreerd
en as bruukboare data uutlezen

aal dichter
op t vel
leggen sensoren vast
wat privacy hait te wezen

t oog
achter Google Glass
is meedogenloos schaarp
mit kèl grèlle kleuren

n identiteit
wordt gewaitenloos stolen
in n wereld
vol cyberdeuren

om reden
van vaaileghaid en van gemak
willen we vrijhaid wel bepaarken

gevolgen
binnen groot as we t veur aaid verlaizen
en wie dit vuilen en maarken

eltje ©

Ongegeneerd

Delete - 1

op sosioale media
stromen en broezen
privacy en data
in millisekonden
de wereld rond

n onbedekte
emo-störtploats
vol hebben en holdens
mit smaartende emootsies
uut n open wond

zail en zoaleghaid
vol verdrait en wellust
liggen bloot
op t stee “to meet”
wachtend op “to delete”

eltje ©

%d bloggers liken dit: