Posts tagged “dag”
in n laand woar
de politiek doulbewust
de trek
noar de stad propageert
as was t door ain groot paradies
leven twij en n haalf
miljoun mìnsen onder
d’aarmoudegrìns
woaronder veul kinder
zunder kaansen in t onderwies
t konsentreren van aarmou
en sosioale uutsloeten
in steden
het dezastreuze gevolgen
zowel moatschappelk as finansieel
t ontvolken van t plattelaand
om de kosten te dekken
veur dure
integroale projekten
is in dizzen hail funksioneel
eltje ©
sommegen
binnen
aan t ìnd
van de dag
lozer
aandern
worden
doarentegen
onzekerder en
besloetelozer
eltje ©
elke dag is der ain
woarop niks is
wat t liekt
want n lach veur d’ain
is veur d’aander n troan
elke dag is n raais
woar in diggels
de kracht bliekt
om veur n leste kans
toch voluut te goan
ontkennen
waarkt remmend
op veraandern van t heden
bekiek
doarom de toukomst
zunder zörgen om t verleden
eltje ©
paniek en stress
knoagen aan t gemoud
want huus en heerd
stoan op t spel
stress en zörgen
bestemmen t verloop
van dag en nacht
in n karoussel
klamme handen
en last van zenen
n stain op moag
is ook n symptoom
noa onderzuik
volgt n diagnoze
patiënt lidt aan
t Grunneger Angst Syndroom
eltje ©
