Posts tagged “cultuur

Tussen de regels deur: mit…..

Om vot mor even mit de deure in huus te valen: der is in onze soamenleven hail wat mis omdat t gezond verstand aal meer n stain des aansteuts is……

Kiek, decennioa laank is der streden tegen diskriminoatsie en rassisme. t Streven was om te kommen tot geliekhaid en doar was en is niks mis mit. Pozitieve diskriminoatsie en mitmìnselkhaid waren doarbie de teuverwoorden. Mor net as bie veul aandere ontwikkelns lieden ook hier de goien onder de kwoaden.

Profiteurs en lu mit dubieuze bedoulens dringen noamelk overaal veur. t Gevolg is dat dizze ontwikkeln bie n groot dail van onze soamenleven ervoaren wordt as veurtrekken van hoedskleur, òfkomst en seksuele oriëntoatsie. En doar zitten ze netuurelk mit in de moage. Veuraal as t recht van persoonlek gevuil regelrecht indroest tegen t recht van t gezond verstand. Wat mout je nou mit n 31-joarege man dij as 16- joarege vraauw voetballen en douchen wil in n kompetietsie mit minderjoarege wichter. Körtom: t recht van minderheden wakkert zo aal meer t onrechtsgevuil bie aandern aan. t Zit ter dik in dat t op n fiasko uutlopt. Mor ja, doar zit dij drammende minderhaid nait mit.

Sommegen perbaaiern hail filaain onze historie te herschrieven of te wissen. Dit aal noar gelang de zin en macht van aktivisten en lobbyisten. Boetendes worden ze voak ook nog deur de stoat subsidiëerd. Vanwege ongezonde politieke korrekthaid worden plaainen, gebaauwen en stroatnoamen hernuimd, worden standbeelden sloopt en bouken uut d’handel nomen. t Vördern van herstelbetoalens is net zo’n uutwas. Onschuldege generoatsies mouten blouden veur d’handel en wandel, ploatsvon in t verleden. Ain ding is zeker: de meerderhaid zit ter mit.

Net as mit aal dij onbenullege mitlopers

Tussen de regels deur – knuppel uut de zak

Der binnen lu dij aandern vervluiken. Heur woapens binnen begrippen as ‘rasisme’ en ‘kultureel touaigen’. Mor des te meer ruumte ze kriegen en des te voaker aandern begrip teunen worden woorden al gaauw doaden. Op stoapel stoande boukverbrandens, dij mit veul tamtam ploatsvinden, binnen din nait meer ondenkboar. t Zulfde geldt veur beeldenstörmen. Mit veul tamtam wordt dit spektoakel prezenteerd as t entree in t nije Eldorado. En inderdoad: sommegen sturen aandern deur t vuur om heur doulen te berieken.

Nou bedenk ik dat ‘tamtam’ deur dat soort drammers wel ains as t kultureel touaigen van n meziekinstrument beschaauwd worden kin. Want der binnen aaltied wel stòkken te vinden om mit te sloagen.

Mor woar k ainglieks t mainst benijd noar bin is wat d’echte driefveren binnen om aandern mit woke-gedrag te terrorizeren. Want as je beweren mentoal te kreperen deur nait zulfbeleefde gebeurtenizzen din is der dudelk wat mis. Körtom: wat drift dat soort volk om zok te misdroagen.

Ain ding is zeker: lu dij mitgoan mit dizze woke-gekte missen de riekdom van datgene woar ze tegen binnen. Weerdes as vrundschop, laifde veur de netuur en solidariteit binnen internationoal. n Goie lezer en verstoander hoalt dat ook uut de vrundschop tussen bieveurbeeld Winnetou en Old Shatterhand. Van doaruut ontwikkel je joen historisch besef en geef je de biebeheurende weerdes deur.

De grootste woke-katalyzatoren binnen traauwens medioa, uutgeverijen en onderwies. Hoogopgelaaid wezen is dus gain gerantsie veur t gebruuk van t gezond benul.

Zollen de verhoalen van Andersen en de bruiers Grimm ook nog op de körrel nomen worden? Lu dij stilswiegend noar de nije klaaier van de kaaizer kieken binnen der ja zat.

Mor ik loat din de knuppel uut de zak…….

Tussen de regels deur – #Winnetou

Hejje t ook mitkregen? In Duutsland wordt t bouk ‘Der junge Häuptling Winnetou’ uut d’handel nomen. De woketerreur slagt doar noamelk weer tou.

Lu in zgn. progressieve kringen steuren zok deraan dat t woord ‘indioanen’ bruukt wordt. As t aan heur ligt kommen der volgens mie strafkampen veur kinder dij zok ooit as indioantje verklaid hebben, omreden kinder dij zokswat doun binnen volgens heur rasisten en moaken zok schuldeg aan kulturele touaigens.

Nou kin je netuurlek denken: ach, dat is ja in Duutsland, mor vergis joe nait. Ook in ons laand lopen der van dit soort gemankeerde mavverds rond. As Lex Barker of Pierre Brice nog leven zollen, zollen ze deur dij dramdeugers aan d’hoogste boom opknupt worden vanwege heur mitwaarken aan de film. Woke-idioten benuimen zokzulf noamelk tot toal- en kultuurplietsie.

Nou luipen der vrouger netuurlek ook dörpsgekken rond, mor dij kregen gain podium van onze landelke deugmedia. Benoam doar schienen veul boazen rond te dolen dij de woke-kedoaverdiscipline der bie heur knechten inrammen. En elk wait: wel zien brood men et, dij zien woord men sprekt.

k Heb nog n video liggen van ‘Der Schatz im Silbersee’, noar n bouk van Karl May. Dij zol der vast gain muite mit had hebben om aal t wokegespuis tou te vertraauwen aan d’aiwege jachtvelden. Lu mit gezond verstand binnen deur t lezen van zien bouken ja nooit infekteerd mit t rasismevirus. Dat virus schient zok nuzzeld te hebben in n bepoald slag lu. Volk dat niks hebben mout van n dappere blaikgezicht dij optrekt mit n indioanenhoofdman. Winnetou en Old Shatterhand. Twij fantaziefiguren. Net as Swaarde Piet.

Nog even dit: ik kom hiernoa nait mit n verkloaren dat hier sproake is van n ongereflekteerde jeudherinnern van n olle blaikscheet…

Schuld

Des te meer belangenklupkes der binnen, des te meer aanlaaidens binnen der om doarover foek te worden. Benoam omdat tolerantsie van dij aandachttrekkende verongeliekten soms te waaineg onderheveg is aan zulfrefleksie. t “Aigen geliek hoalen” verhaardt aal meer tot n schimmege stried, woarbie sommege “slachtovvers” zich draaien en keren in t deur heurzulf geabsorbeerde leed en verdrait. Bie veurkeur mouten aandern doarveur blouden en…… betoalen. Westers of nait-westers, allochtoon of autochtoon, swaart of wit: t moakt niks uut.

Der is zoveul leed in de wereld en der binnen zoveul schrienende problemen. Desondanks steken veul lu bie veurkeur kaptoalen en (voak ook nog negatieve) energie in hikhakkerij over onderwaarpen as diskriminoatsie, etnisch profileren, rasisme, en gendervarioatsie. Wie schienen in n tied te leven dat alle subjektieve perblemen van n relatief klaaine minderhaid oplöst worden mout. De schuld wordt bie veurkeur bie d’aandern legd.

Veurdat je nou reageren mit: “Dat is wel hail kört deur de bochte”, nog even t volgende:

Der binnen ontwikkelns goande dij bie oprechte en tolerante mìnsen gevuilens van òfkeer en onbegrip oproupen. t Zelfde geldt veur diskriminoatsie. Baaide lös je nait op mit apaarde organizoatsies, òfgeschaaiden belangenverains of agressieve grootbekkerij. t Is veul beter om soamen en geïntegreerd perblemen aan te pakken. As je ìnkeld deur joen aigen pazzipanten beïnvloud worden levert dat n ainziedeg en vertaikend beeld op. t Zicht op de waarkelkhaid wordt verblind en kleurd deur aigenbelangen.

Tolerantsie?

Tja, kinder speulen soamen in de zandbak mit heur vörmkes, haarkjes en schepkes. Kleur, geslacht en ras is doar nait van belang. Zai zain gain wereld van meerdailens woarin veuroordailen aan oordailen veuròf gaait. Zai kinnen nait de verachtelke daibe hoat dij bie aal meer lu veur in d’agendoa staait. Zai hebben gain wait van zaikelke frustroatsies veurtkommende uut rankune en weloverwogen wroak. Toch gaait ter op weg noar volwazzenhaid veul mis.

Ach: verongeliekte zielepoten hebben netuurlek wel degelk n perbleem.

Inderdoad: voak heur aigen…….

Jota

Zo as bekìnd binnen de coronavarianten benuimd mit n letter van t Griekse alfabet. De WHO wol òf van t stigma dat de landen, woar de varianten veur t eerst signaleerd waren, opplakt kregen. De Grunneger mutant is der dus ook nooit kommen. Wellicht goa je nou nait meer noar de Griek, mor eet je joen suzuki en souvlaki in n Omegarestaurant. t Zal mie ook niks verboazen as der stemmen opgoan om bepoalde de kruden op n dag “omegakruden” te nuimen. Dij kriegen netuurlek wel wat varianten. Aans streu je joen Biftekikruden ja in bieveurbeeld joen gyros.

Kiek, dizze maaljoagerij paast volledeg in de woke- en cancelcultuur. Mit n terminologische breekiezer denken bepoalde lu diskriminoatsie, rasisme en stigmatizeren uut te bannen. Ook de genderdiskuzzie vaalt in dizze kategorie. In Duutsland openboart zok dit kaberet in t gebruuk van gendertaikens. Zo kom je doar veur t woord “artsen” de woorden “Ärzten“, Ärztinnen, Ärzt*innen“, „Ärzt_innen“ en „Ärzt:innen“ tegen. n Toezeboudel dus. Ook doar binnen veul lu “slim bliede” mit dizze ontwikkeln.

Je kinnen joe òfvroagen of dit stand holdt. Ik heb t gevuil dat bie aal meer lu t benul aan slietoage onderheveg is. As boeddhisten zok ruiren omdat heur Boeddha pest wordt, kin Boedapest zomor Psipest worden. En wat zal t mit de Turkse nationalistische tröts doun as heur meugelke mutant “Jota” nuimd wordt? Tja, de wereld wordt aal gekker.

Snappen ie t nog? Ik snap ter noamelk gain jota van…..

%d bloggers liken dit: