Posts tagged “COVID-19

Buurman Jan: staine

“Wat ligt doar noast dien kopke? Drinkst toch kovvie zunder suker. Of wolst ter nou opains stainklontjes in?”

Buurman Jan was aanschoven aan de keukentoavel en haar veur zok n staine op toavel liggen.

“Nee, ik huif gain suker. Dit is n gewone stainen staine,” zee buurman Jan. “Dij lag net nog bie die op t grintpad. Dij wil ik even mitnemen veur t geval dat. Astoe doar teminnend gain bezwoar tegen hest.”

“Nou, nee. Stainen zat. Mor wat veur ‘geval’ bedoulst?” vruig ik.

“Nou kiek, mien Griet zit vol van de gebeurtenizzen rond The Voice,” ging buurman Jan wieder. “En nou bin ik bange dat ik binnenkört ook mit t wotter veur de dokter mout. Elk moal as t over dij piazzen gaait heb ik t gevuil dat zai noar mie glopt en dat ter n vroage op heur lippen braandt. Nou, as dij vroage komt hoal ik dizze staine uut de buutse en zeg: wel zunder zunde is waarpe dizze staine.”

“Paas mor op,” zee ik. “Ook al gooit ze, der blift bie die aaltied twievel. En as zai nait gooit kinst ter op reken dat ze stain en bain kloagen gaait over dien achterdocht. Körtom: t kon wel ains veul schoade oplevern en dat is ja zunde om wellicht niks. Kiek, n ol wief botter aan de kont smeren en zulf dreug brood eten, dat is n echte zunde. Man, as k die n road geven mag: gooi dij staine mor gaauw weerom op t grintpad.”

“Zolst denken?” zee buurman Jan. “Nou ja, ik goa mor weer noar mien Griet. Wie goan dammeet noamelk veur ons baaident n pedde mit oorkleppen kopen. Dat wordt n aanvullen op onze Pfizerprikken, boostertjes en mondkapkes. Kiek, oren, neuze en mond stoan ja via allerhaande holtes mit mekoar in verbinden. Nou, dat waarkt as n trekgat. As je din n mondkapke opdoun en doarbie d’oren goud òfsloeten veurkom je hailemoal dat viruzzen in joen pokkel trekken. Traauwens, zo’n pedde mit kleppen helpt ook tegen t kommende gevoar van dij zogenoamde kwantumkomputer. Deur zien aldernoarst grode rekenkracht kin dij elk gehaaim kroaken. Nou, doar steken wie din mit onze petten n stòkje veur. Aal wat je onder de pedde holden blift ja gehaaim, nee din? Nou tjeu!”

En vot was buurman Jan. n Staine in de buutse, n mondkapke veur en n pedde mit oorkleppen op de kop. n Echte pebliekstrekker.

As dat mor gain stain des aansteuts wordt….

Buurman Jan: vegen

“Dou mie in dizze duustere Midwintertied mor gaauw n kop kovvie. En joa, ook n omstok grunneger kouke derbie. Dat wolst ja toch vroagen. Hest in elks geval al t antwoord, want tegenwoordeg lieken der gain goie antwoorden meer te wezen. Wie waiten deur dij pandemie ja nait meer woar w’aan tou binnen. Lu binnen kompleet op n hobbel. Sommegen zitten te springen om klandizie, aandern hopen dat de klanten votblieven. t Jonkgoud krigt gain fersounlek onderwies en boostern gaait ter in as gods woord in n olderling. Nou ja, behaalve din bie de lu dij idoloat van hom binnen.”

Buurman Jan haar zien stoule nog nait ains waarm of hai haar d’haile toustand in de wereld al even grondeg deurnomen. Ik schonk ons in tied n kop kovvie in en nog veur ik t mes in de grunneger kouke zet haar revelde hai al wieder.

“Man, busdainsten worden schrapt of omgooid. Buurtbussie ridt nait meer. Jan Piepke noast ons ging aaltied drij moal in de weke noar Stad mor zugt zien oepkes nou in rook opgoan. En in zaikenhuzen zain ze joe laiver goan as kommen. Doarentegen zitten ze bie Huize Esmeralda weer te springen om volk. Wat zeg ik? Springen? t Is doar meer wupperij. Doardeur kin swoagertje Tjapko zien zoad nait meer op n schiere menaaier kwiet. Dij is nou overleverd aan n noodgreep van mien ol opoe. Dij advizeerde mien opa mit: loat dien boksem nou mor n zetje zakken veur t gemak en t voesieknakken. Zai haren op n gegeven mement noamelk 12 grommen.

Kiek, om rond te kommen waarkten lu zok vrouger krom. Mor nou lieden lu onder Omi-krom. Woar mout dat hìn. Je kinnen ja naargens meer noar tou. Wie zitten te gloepen noar flatscreens en gleren wat over retinoagloazen, want doarachter speult zok d’echte wereld òf. De tied dat je as n hippie mit joen VW-campertje onbezörgd de wereld beraaisden komt, as t aan veul regerens ligt, nooit weer. t Is beurd mit lösbandege uutbundeghaid. Vlinderknippen en omdiedeldaantjen worden verleden tied. En dat mout ik normoal vinden, omdat ons verknold wordt dat wie ons gedrag drastisch veraandern mouten? En omdat ze ons veurholden dat dit ons toukomstege Eldorado is? Man, je worden der ja abnormoal van. Ik zeg die dit: wie verkwanzeln in n poar joar tied onze swoar bevochten vrijhaid. Wereldwied binnen politisie dounde om dij nije normaliteit in grondwetten vast te leggen. Kiek, ik bin gain komplotdenker of BaudetEngel, mor in zo’n soamenleven kinnen wie mìnsen nait leven. En je binnen dammeet achter joen aigen veurdeure nait meer vaaileg.

Kom, ik goa mor weer op huus aan en stap even over de drumpel van mien Griets veurdeure. Doar mag ik nog aal zunder bepaarkens achter kommen. En ik mag van mien Griet aaltied nog veur heur deure vegen.

Tjeu……”

En vot was e. Buurman Jan haar in wezen geliek. Veul terechte kritiek op t in- en bepaarken van onze vrijheden wordt tegenwoordeg mit groot gemak onder vlouerklaiden veegd.

n Levensgevoarleke ontwikkeln, want ‘van de koarde vegen’ komt din aal dichterbie…….

%d bloggers liken dit: