Posts tagged “bestoan

Oplözzen

Resomeren

t aiweg bestoan wordt
makkelk beschreven om
n paredies te kreëren

mor as t tied is budt
t woord gain kans
n stee te rezerveren

ondanks zuiktochten
noar levenszinnen is elk
geboren om te goan

dus wordt de dood
kommersieel vermaarkt en
geft aandern n bestoan

verdainmodellen binnen
der te over want elk
zugt wel n belang

onder deksels wordt soms
stereo monteerd veur
joen leste noten op zang

wil je t vuur
noa aan de schenen
bezuik din joen kremoatsie

en wil je n gang
deur t geutgat ervoaren
din is der rezomoatsie

eltje ©

Raand van d’òfgrond

Òfgrond
de teloorgang
en de dood zitten
gnivvelnd en kniezend
te wachten in n failliete
baauwvaal van de soamenleven

rolstoulen van
verzwakte slachtovvers
stoan parkeerd omreden
de wil tot n zinvol bestoan
het t begeven

onder aan
de negatieve spiroalen
wachten inkommensdoalens
en biestand zunder zicht
op toukomstperspektieven

gemainten goan
te gronde omdat zörg
en veurzainens roofgoud worden
en rechtvoardeghaid uutlegd
wordt mit duustere motieven

eltje ©

Tranzietsie

Tranzietsie
as
t eerste vertrekpunt
nait t welwezen is
en der gain verband bestaait
tussen belasten
en gezond verstand

as
n overhaid
t harnas aantrekt
en t volk mit de rug
tegen de muur
verwordt tot oartsvijand

din
wordt recht
krom
en ontoardt t bestoan
in n sinistere absurditeit

din
wordt woan
waarkelkhaid
en verweven baaident
tot n raauwe realiteit

eltje ©

%d bloggers liken dit: