Posts tagged “beelden

D(estruktieve) N(aaigen) tot A(grezzie)

DNA

doagliekse beslommerns
verblaiken bie de beelden
van barbarijen en
tragedies dij
ons benul deurzeven

herrezen werelden van
guster plegen aansloagen
op t koestern van
n vaaileg en
vreedzoam leven

t is asof zulfdestruksie
zich worreld het
in t mìnselk DNA

want elke generoatsie
beleeft wel zien
aigen sloopdrama

eltje ©

Leegte

image

elke dag
n aigen wereld
overaal hìn
naargens noar tou

stille stemmen
maank veul verbeeldens
van eertieds
parallel aan t nou

waarkelkhaid
vol voage beelden
veul graauwe gedachten
op dien menaaier

gain vreeloos moment
onrust kin t wachten
doagen duren aiweg
elk ketaaier

eltje ©

Toukomst

bie n deurkiek
n verloaten gat
onder vergeten noamen
zöcht fantazie
zoveul zinnen
om beelden in te roamen

woar schares scheuren
vougen verrötten
vaalt licht op olle tieden
woar geborsten holt
as stammen stoan
het toukomst niks te lieden

n pad noar naargenswoar
kleurt de roegte
spraaidt t wildgewas
mit aargens kansen
van nij begun
veur ongerept gruin gras

eltje ©

%d bloggers liken dit: