Posts tagged “awbz

Mantelzörg

Twij handen

verantwoorde zörg
aan oldern-zaiken
wordt aantast en
slim indiskreet

huusgenoten mouten
mit femilie en buren
helpen tot
de dood intreedt

mor

femilie het buren
mit vrunden en bekenden
en dij hebben zulf ook
weer huusgenoten

dit swaartste hoofdstuk
laaidt tot doodslag en
wordt wellicht nooit
meer sloten

eltje ©

Zörgroverij

Zorgroverij

de regeren prist
t nije zörgstelsel aan as
n zegen veur de
moatschappij

mor in dij walhalla
wordt pazende zörg
kenmaarkt deur
minimalizeerderij

t is t eldorado
van verzekeroars dij
as rechter en beul
marchanderen

t is t paradies
veur beoordailoars dij
indikoatsies aigenhandeg
definiëren

zörgbehuiftegen en
mantelzörgers goan systemoatisch noar
de haaien

want t ultime doul van
verzekeroars is om in spoarsaldo’s
te graaien

eltje ©

Dodelk

Oldernzörg
oldern
worden karakterizeerd
as n last en
ze hangen t jonkgoud
as meulenstainen
om de nek

t leven
is allint rendoabel
veur jonge goden
en bonusknuteroars
dij kloagen over
geldgebrek

betoalboarhaid
van zörgkosten
was boazeerd
op solidariteit en
was gain onderwaarp
van haandjeklap

t wachten is
op t mement
dat oldern
nait meer betoalen willen
veur sportblessures
en zwangerschap

eltje ©

Zörg-ontzekern

Zörgontzekern
verzekerns worden uutkled
tot op t hemd en
alom woart waarklooshaid

n gezondhaidskrisis
ligt op de loer aal
onder politieke verantwoordelkhaid

drastisch bezunegen
het fatoale gevolgen
veur de gezondhaid van jong en old

as politisi
dij realiteit negeren
wordt de toukomst kèl en kold

statistieken teunen din
schrikboarende beelden
van vervaal en open wonden

deur t onbetoalboar worden
van neudzoakelke hulp
binnen mìnsenrechten din schonden

eltje ©

Levenskwaliteit

Levenskwaliteit
t wettelk recht op zörg
staait doaneg onder druk
vanwege belaaid en regelgeven

aal meer wordt kwaliteit
òfhankelk van kunde
en beschikboarhaid van d’omgeven

wetgeven en waarkelkhaid
verweven weldroa
tot realiteit

de kans is groot dat
t landelk belaaid ontoardt
in n kalamiteit

n krisis
mout je bestrieden en
zo meugelk beslechten

t wordt zörgelk
as dat ten koste gaait
van gezondhaid en rechten

eltje ©

Òfwegens

Òfwegens
de man kikt
deurdringend in d’ogen
van de vraauw tegenover
dij ain en aal zenen
poestend en stìnnend
talloze zoaken verkloart

verkregen gegevens
worden digitoal verwaarkt
en n laptop brengt
noa n leste drok
op enter d’uutslag
definitief in koart

onder t mom van
bedainen op moat
en persoonleke aandacht
wordt de levensloop
blootlegd en ligt de noadrok
op t beheersen van kosten

verlainde mantelzörg
deur buren of femilie
wordt uutruild
tegen n traplift
of steunkouzen
en aandere posten

t recht is verdrongen
deur intakegevallen
en de puutholder is ain
mit de beoordailoar

de terugtredende overhaid
komt ain nait tegemuide
en t welwezen weegt din
wellicht minder zwoar

eltje ©

%d bloggers liken dit: