t Waren dit weekend schiere doagen en der waren, zo as verwacht, veul lu bie t pad. Guster was t ook ja “moederdag”. Boetendes waren de stranden slim in trek. De € 50,00 gingen op de boulevard in Scheveningen as broodjes in de parkeerautomoaten. En der waren netuurlek gestoakte voetbalwedstrieden. Dat was mie weer n dikke schietboudel.

In de media kin je aaltied nog lezen dat idioten en kriminelen “supporters” en “fans” nuimd worden, terwiel t in wezen n horde is dij, nog minder as baisten op jacht noar wild, alles wat lös en vast zit schoamteloos verhinneweert en versteurt. Dit wordt deur de media voak optaikend as protestaksies. Mor dizze debiele malloterij wordt uutvoerd deur n koppel agressieve wilden. Verstandslozen dij heur twijde kans al laank verspeuld hebben, mor dij desondanks toch weer mit heur tronie veuraan zitten maggen.

As dij aso’s uut heur krochten en spelonken kroepen, blieken ze elk moal weer n schaande veur de sport in t aalgemain en veur de betrokken klubs in t biezunder te wezen. Ze kinnen ongeremd heur hobby uutvoeren: hou joag je t gewone volk t stadion uut.

De verantwoordelken van supportersverainens hebben veul te laank n tolerante holden aannomen tegen dit tuig, terwiel elk wait: n waike holden tegen n haarde kern is op veurhaand n mislokken.

Mor ook bestuurders treft schuld.

Konsekwent wezen komt bliekboar ìnkeld veur in heur dure, lievege rapporten, opsteld noa veul te laank geleuter en gekwak. In heur wereld van gold en glorie is sportiviteit aal meer ondergeschikt worden aan banksaldo’s, woarbie sport vermaarkt wordt onder t drinken van whiskeys en cointreaus. Verkwanzeln mag ja wat kosten, nee din?

En din te bedenken dat dit nait ìnkeld bie sport t geval is.

Triest mor woar.

Fans verdainen beter…..