“Ik heb mie veurnomen om nait meer laks over te kommen. Doar heb k sinds kört n grode hekel aan.” Buurman Jan was as n hoaze de keuken instoven en zat kloar veur zien bak kovvie en hombe kouke.

“Nou, doar zal dien Griet van opkeken hebben,” zee ik. “Dat is zai ja nait van die wìnd. Kiek, dien kovvie en kouke.”

“Ik beschaauw dat mor as n grapke,” zee buurman Jan vranterg. “Waist, ik las n artikel over LAKS. Dat is n stichten dij zok inzet veur t wel en wee van middelboare scholieren. Subsidieerd deur t riek mit dik zeuven tun.”

“Zo, laks wezen loont dus,” zee ik.

“Proat mie der nait van,” foeterde buurman Jan. Dat LAKS-volk komt mit n lieste van verboden woorden. Zai denken dat mien Griet en ik ‘doubeleren’ aans inschatten as ‘zittenblieven’.

“Doubleren,” verbeterde ik.

“Dat zee ik,” ging buurman Jan verhit wieder. “Woorden as ‘swaarde schoule’ en ‘achterstandsleerlingen’ mor ook ‘jonges’ en ‘wichter’ kommen op heur swaarde lieste. Ook ‘hoog- en leegopgelaaiden’ kinnen bie t grof voel. ‘Gehandicapt’ mout volgens heur ook in de ban. ‘Slimme’ leerlingen mag ook nait meer. Aandere leerlingen zollen zok minder goud vuilen kinnen as zai nait ‘slim’ nuimd worden.

“Zo, din mag: as je veur n dubbeltje geboren binnen wor je nooit n kwartje zeker ook nait meer,” zee ik.

“Hol mie der over op,” motterde buurman Jan. “Dij drammers binnen nait wies. Heur ‘nait meer van dizze tied’ is onze toal mit aal zien historische riekdom aan t vergraimen. Mor ja, genderij is netuurlek wel slim prominent aanwezeg. Man, k wor beroerd van dat achterlakse gedou. t Wordt mie gewoon dik van achtern.”

“Din most ook ja nog op n vezeldieet,” zee ik taargend.

“Tou mor weer, moak der mor n geintje van,” reageerde buurman Jan as deur n ieme stoken. “Ik zeg die dit: ze willen dosenten veurschrieven welke woorden nait meer maggen, mor loaten ze zok mor drok moaken om dij mobieltjederij in de klazzen. Mit heur achterleke zeuven tun kostende idioterie hollen ze zokzulf zo schier in stand, omreden de telefoon van heur klachtenliene is nou netuurlek ook boeten d’exoamentied glìnrood. En dat aal omdat n klaaine kliek mentoal gemankaaierden t abnormoale normoal verkloaren wil. Overtreders kommen via heur gesubsidieerde klachtenliene aan de schaandpoale. Nog even en de guillotine staait op t schoolplaain. Nou, ik loat mie nait opleggen welke woorden mien Griet en ik as dominant ervoaren mouten en welke woorden stereotyperend binnen. Mien Griet het nog aaltied n blaanke hoed. Dij is bie lange noa nait wit. Dat heb k gusteroavend zulf nog konstateren kind dou ze heur nije lingeriesetje mit veul kant en netwaark uuttrok. En ik hoop dat t nog laank duren mag veurdat zai liekwit is en in heur widde hìnklaid in n kiste ligt. Kom, ik goa gaauw weer noar heur tou. Tjeu.”

Vot was Buurman Jan. Toal het de macht om mìnsen te roaken bleek mor weer. Voak deur onneuzelhaid, körtzichteghaid en vanwege t ontbreken van mentoale weerboarhaid.

Tja, dik van achtern……..

Ach, LAKSerende middeln helpen in dit geval vast ook nait…..