“Kovvie zeker. Mit n plak Grunneger kouke. Volgens mie hest dat wel verdaind.” Veurdat buurman Jan antwoorden kon haar k t hom al veurzet.

“Nou dast t over verdainen hest ja”, zee buurman Jan, “ik heb n idee veur n nij verdainmodel. Tegenwoordeg willen lu ja aan alles verdainen. Aan t gebruuk van gas, benzine, abonnementen, internet, datakoabels en nuim mor op.”

“Inderdoad,” zee ik. “As t even kin trekken ze joe n pode uut. t Duurt nait laank meer of zulfs t wotter komt op de bon.”

“Dat zeg ik,” zee buurman Jan. “Vergeet CO2 en stikstof nait. En netuurlek alles wat mit energie te moaken het. Aal meer lu leven zörgeloos van de wind. Veur 2030 binnen der hail wat miljonairs biekommen. Ze willen ons ja leuven loaten dat in 2030 ons laand reddeloos verloren is.”

“Doarom dut elk nog even zien best om zoveul meugelk uut de grode geldpot te graaien veurdat t klimoat ons nekt,” zee ik.

“Krek,” zee buurman Jan. “En doarom heb ik n idee, n verdainmodel zeg mor. Onze regeren zegt dat alles draait om stikstof. Nou, doarom heb ik op beune n prototype van n scheetmeter moakt. Mien Griet naait mie dij in de boksem. Doarmit kin je t aantal scheten dij je loaten meten. Ik stel mie zo veur dat doar binnenkört verlet om is. Kiek, n loze regeren zugt ook doar brood in. Via digitoale wegen kin t kabinet instellen houveul scheten je per dag loaten maggen. Dat kin zulfs op postkode. Elke scheet betaikent ja stikstof in de locht. Nou, as je boven t tougestoane aantal scheten kommen mout je belasten betoalen. Hou liekt die dat?”

“Tja, wat mout ik doar nou van vinden,” zee ik. “Is dij scheetmeter van die achter in de boksem software of hardware? Want as t hardware is din wordt dat n ongemakkelke zit. Dat ding zit joe ja in de wege.”

“Man, doar zit wat in,” zee buurman Jan. “Ik goa gaauw noar huus veurdat mien Griet dat vaarkant blokje achter in mien boksem naaid het. Doar mout k veuraan wezen, aans ragt zai mie de boksem vol. Tjeu!”

Buurman Jan runde uut de keuken om bie zien Griet te kommen. Want hai wos ook wel dat zai van n scheet n dunderslag moaken kon.

Tja, en dat zol vast meer wezen as n klapscheet…….