“Kouke, lekker. Doarveur bin k hier bie die ja op t goie adres. Mien Griet het onze bakkerij sloten.”

Buurman Jan nam zien eerste hap. “Din dou k die der ook nog n kop kovvie bie,” zee ik. “Dien Griet is zeker stopt mit bakken vanwege d’hoge gaspriezen.”

“Nee, mien Griet is bewust dounde mit alles wat milieu en gezondhaid aangaait,” zee buurman Jan. “Zai het lezen dat je van gaspitten astmoa kriegen. Lochvervoelen in de keuken kin ook bie volwazzenen negatieve gevolgen hebben. En din te bedenken dat wie al op gas koken sinds d’òfschavven van kookfornuus en zakkedeltje.”

“Ik heb in schuurtje nog n swaarde zakkedel stoan. Mien opa is doar vrouger ais n moal tot t toetje uutkropen dou hai mit n maal ibbel in dat kedeltje zat,” zee ik laggend.

“Heb de gugel der mor mit,” zee buurman Jan vranterg. “Onderzuikers binnen tot de konkluzie kommen dat ter meer as 70.000 kinder in Nederland meschain wel symptomen van astmoa hebben kinnen. En dat omdat ter bie heur thuus op gas kookt wordt. Tja, en nou bakt en broadt mien Griet dus nait meer. Guster is mie t eerste rezeltoat al veurschuddeld: gestoomde gruinteprut uut de magnetron. Ik kreeg de wind van veuren dou ik dat spul ‘utjekul’ nuimde. Dat zee mien ol opoe noamelk ook aaltied tegen eterij wat ter wat twievelachteg uutzag.”

“Dat woord kin ik,” zee ik. “Doar bin k ook mit groot worden.”

“Hol mie derover op,” naarde buurman Jan. “Nog even en din is volgens onderzuikers stomen ook n ongezonde dieverdoatsie. Volgens mie willen ze ons overzetten op knienevreten. Raauwe worrels, witlof en brokkolie en zokswat. Man, t stoom komt mie al tot d’oren uut. Ik zeg die dit: over n moand of wat liek ik in dizze boksem as n moes in n meelzak. Dij zakt mie din van de kont òf.

Mor kom, ik goa mor weer noar onze stomerij. Ik mos van mien Griet de komkommer even in dobbeltjes snibbeln. Dij kommen deur de koeskoes, soamen mit wat overgebleven worrelnat van guster. Tjeu!”

Buurman Jan slofde mit lood in de schounen op huus aan. t Was ook ja gain flaauwekul wat hom overkwam.

Man, man, man, hai was overleverd aan Griets utjekul…….