“Hest t ook mitkregen? Dat van dij twij Urkers dij uut mekoar binnen?” Buurman Jan zat aan de keukentoavel te wachten op mien antwoord.

“Nee,” zee ik. “Ik vin ain urk al niks, loat stoan twije. k Heb nait veul op mit onbelangrieke lu. Kovvie?”

“Nee, ehh……ik bedoul joa kovvie, mor nee lu,” zee buurman Jan. “Dij Urkers binnen BN’ers. Ze kommen van Urk. Zai deden mit aan de realityserie ‘Urk’. Mor ze hebben besloten om n punt achter heur reloatsie te zetten. t Wicht het t toentje in t zoad, mor ze binnen tot de konkluzie kommen dat ze nait bie mekoar pazen. Tja, eerst branieschoppen op tv en din de keudel intrekken. Nou ja, ik heb ter ook nait noar keken hor, mor mien Griet is der stoapelgek op. Ik zee nog: t is n ordinair verdainmodel Griet, mor zai zee dat ze der op de braaimörgens in t buurthuus wel over mitproaten wol. Aans leek t ja net of zai n steek lös haar.”

“Tja, vraauwlu binnen wat mans zeg k die. Dij loaten onder t kwedeln gain steken valen,” maarkte ik dreuge op.

“Dizze steek onder wotter vertel k mor nait aan mien Griet,” zee buurman Jan. “Ik zeg die dit: der komt niks gain gouds van aal dij realitykwakkers, Instastumpers en Tiktoktuthola’s. En vergeet ook nait aal dij bloggers en vloggers. Man, wat moakt t mie nou uut wèl mit wèl onder de loakens legen het. Ik las dat lu, dij in t onderwies waarken, overwaarkt binnen en de leerlingen overstresst. Tja, wat wilst ook. Dij leerlingen binnen ja vergruit mit heur buutsmobieltjes. Ze gloepen d’haile dag op heur schaarmke of der ook nog nijs is over ain van heur BN’ers. Ze worden der d’haile dag deur òflaaid. De deur de media gekreëerde BN’ers doun doar gain gouds aan. t Jonkgoud komt aan leren nait tou.”

“Klopt,” zee ik. “Achter aal dij gleervìnsters loert ledeghaid.”

“Doar zegst wat,” ging buurman Jan verder. “Waist wel dat n Belg n draank mit de noam ‘Joesie Loesie’ op de maarkt brocht het. Doar zitten ehh….. adapsie…ehh… to .. ehh.. adoptogenen in. Dij schienen stressverlegend te waarken en helpen zulfs tegen n burn-out. Ik denk dat ik mie ook n poar van dij vleskes bestèl. Tja, elk het wat, ik heb mien Griet. Kom, ik goa gaauw noar heur tou. As k te laank votblief zegt zai dat ik mien tied verplaasd heb en weer gain steek opschoten bin. Tjeu.”

Buurman Jan ging op huus aan. Ik zag hom in gedachten slobbern in de Joesie Loesie. Man, wat ter toch ook nait aal moakt wordt. Ik keek noar n deuske op mien kaaste. Doarin zat mien allerlèste loesie.

n Aandenken. n Herinnern aan mien knikkertied……..