“Zitst ja weer op dien proatstoule. Vergeet nait dien kovvie op te drinken, aans wordt dij kold,” zee ik.

“Kaalm aan, ik heb gain loden piepke,” zee buurman Jan. “Traauwens waist woar k mie over verboas? Over de meneuvels dij lu uuthoalen as heur de broodkrummels steken. Mien ol opoe zee vrouger din aaltied: as t joe jeukt aan kop en tonen, hejje last van joen hormonen. Ik herinner mie nog dat ik din mit mien Griet onder in slootswale wat lag te snoetjeknovveln. Wie luiten kerke netuurlek wel midden in t dörp. Nou ja, òf en tou luiten we de klokke even luden vanzulf. Mor tegenwoordeg is t ja bie de wilde knorhoanen òf man. Ik las wat over de fratsen van n stèl dat riedende op n plof n nummertje muik. Wat lu toch ook nait aal uutvreten.

n Britse gynaecoloog woarschaauwde lèstdoags veur n trend woarbie lu kerstversierens bruken om zok te bevredegen. In alle erotische goaten schienen zuurstokken, sokkeloakoegels en kerstbalen as dildo’s in en uut te glibbern. Mor t sukergehalte van bieveurbeeld zuurstokken kin t micro….ehhh…..microbioom versteuren, mit n grode kans op swoare infeksies. Nou, en din hejje de poppen aan t dansen. Din is de knuppel uut de zak, zeg ik die.”

“Joa, veur sommegen is niks te gek. t Is gain gek dij t veurdut, mor dij t noadut,” zee ik.

“Krek,” ging buurman Jan verder. “Dou mien Griet net aan t foeveln was mit onze nije 5 meter lange lichtslange mos ik onwillekeureg aan t reloas van dij gynaecoloog denken. In gedachten luip mie de griezel over de graauwel. Man, je mouten der toch nait aan denken dat dij slange tiedens t hoogtepunt noa 3 meter vast komt te zitten. Dat dou je toch allìnt mor mit n doene kont, zol je denken. t Zal vast n haile verlichten geven as je der in t zaikenhuus weer van verlöst worden. Nou ja, de gynaecoloog huft din gelokkeg nait in t duustern te tasten. Even de stekker in t stopkontakt en hai kin bie lichten zain of t ìnde in zicht is. Ik las ook dat ter n stovvel wèst is dij tiedens n wilde eskapade zien snikkel vertikoal broken het. Din bin je toch nait zuneg op joen raive.

Mor kom, ik goa weer noar mien Griet. Even kieken of zai intied kloarkommen is mit de lichtslange. Tjeu!”

Buurman Jan ging op huus aan en ik docht: kerst, de doagen van soamheureghaid. Veur hail veul lu n bevredegende gedachte……