“Kovvie?” t Was ainglieks n overbodege vroage, want buurman Jan zat ter al kloar veur.

“Geern, ik heb dörst as n peerd. Dat is ook ja gain wonder mit dizze waarme en görtdreuge doagen,” zee buurman Jan. Nou we t toch over drinken hebben: hest t ook mitkregen? Der binnen verschillende onderzuiken wèst om te kieken houvuil alkohol je drinken maggen veurdat t schoadelk wordt veur joen gezondhaid. Nou, ik zeg die dit: t is nait aan te bevelen om zo doen as n törf te worden. Manlu maggen per dag mor 10 gram pure alkohol drinken en vraauwlu 20. Dat komt overain mit 250 ml bier en 100 ml wien.”

“t Is dus nait gezond om zo doen as Maastricht te worden,” zee ik.

“Och, dat is te zeggen. n Aander onderzuik komt tot hail aandere konkluzies. Doaruut bliekt noamelk dat noarmoate je older worden je aal meer alkohol tot joe nemen maggen. t Jonge manvolk mag per dag mor ain borrelgloaske bier drinken. Twij theelepels wien kin ook. Vraauwlu maggen twij eetlepels wien opslobbern of 100 ml bier.”

“Tja, din kiek je de wereld in elk geval nait aan veur n doedelzak,” zee ik.””Geldt dat ook veur onze leeftiedsgroep?”

“Nou, as je boven de 40 binnen kinnen ain of twij gloazen helpen om haartinfarkten en diabetes te veurkommen,” zee buurman Jan. “Dus mien Griet en ik goan der vanoavend lekker tegen aan. Wie mommeln din mit n gerust haart ook nog wat keze en worst op. Lekker man. Mor ik zörg der wel veur dat mien Griet nait zo doen wordt as n kakstoule. Alhouwel: mien opa zee aaltied: n doen wief is n ingel op bèrre. Nou, tjeu!”

Buurman Jan zag t veur vanoavend wel zitten. Mor woorden binnen ja nog gain doaden.

Traauwens: zol hai ook waiten dat kinder en doene lu de woarhaid zeggen?