Nait elk is steld op t benuimen van zien of heur karakteraigenschop(pen). Zolaank t pozietief is wil t nog wel, mor as der sproake is van minder floriezant gedrag din binnen de roapen voak goar. Veul politisi kinnen doar over mitproaten.

Nee, as lu in n slecht daglicht kommen hebben ze voak lange tonen. Ook de lu dij van alles uutvreten en zich van god noch gebod wat aantrekken. t Vaalt mie op dat dij, as ze der op aansproken worden, hoogst verongeliekt binnen en de schuld mainsttied bie aandern leggen.

Biko drokde zien neuze tegen mien bainen aan en ik was doardeur weer in t heden beland. k Was tiedens t wachten even votdodderd en elk wait: ook din draait de wereld deur. Twij broene ogen keken mie aan en ik docht: “As elk nou ais zien karakter haar, din zag de wereld der hail aans uut.”

Mor ook in d’hondewereld heersen wantoustanden. De puppy-handel komt aal meer in handen van kriminelen dij veur t geld over hondelieken goan. Boetendes binnen der veul prachtege laive honden dij rondlopen mit n verkeerde boas aan de liene. En nait te vergeten de lu dij heur hond honds behandeln.

Ik knupde t plastic puutje dicht en ik keek nog even om mie tou. Tja, veul aandere hondebezitters haren zok in t openboar weer dudelk te kakken zet……..