“Ik goa op kurzus. Noar n griepkurzus of beter gezegd: n grepenkurzus.”

Buurman Jan was nog mor net aan de keukentoavel dele plofd of zien haart luit zien revel alweer overlopen.

“Wilst die ook even bekwoamen in d’Hollandse greep? Hest zeker lezen dat dij greep in Engeland verplicht wordt as de bestuurder doar uut d’auto stapt,” zee ik.

“Nee man, der is de lèste tied ja zoveul te doun over grìnsoverschriedende handtastelkheden. Nou, zokswat moakt mie as eerzoame man slim onzeker. Ik wait nait meer wat nou wel en wat nait meer kin en mag. Boetendes vaalt t mie op dat mien Griet de berichtgeven hierover aldernoarst schaarp in de goaten holdt. Lestdoags zee ze nog dat ik t nait in de kop kriegen mos om pikeur te worden.”

“Tja, doar bistoe ook ja veul te old veur. Krom as n houpel veurover op n peerd. Dat is niks veur die,” zee ik taargend.

“Nou nee, dat bedoulde mien Griet nait. Zai het bie heur doagliekse kruuswoordpuzzeltjederij aargens lezen dat ‘pikeur’ ook ‘laifhebber van vraauwlu’ betaikent. Dus het ze mie votdoadelk de wacht aanzegd. Ik mout in t vervolg dus hail goud oppazen woar of ik heur griep. Nou, en op dij kurzus krieg k holvast over alle greepmeugelkheden dij binnen de grìnzen van fersoun liggen. Man, t kin toch nait zo wezen dat ik grieplam wor omdak benaauwd bin veur de meugelke gevolgen. Nee, k wil op körte termien vasteghaid hebben veurdat mie d’angst in zien greep krigt. Dammeet krieg k mien eerste les. As k mie nait meer vergriep, kin k mit n gerust haart de Heimlich- en de Rautekgreep toupazen zunder dat ik doar trammelant mit krieg. n Mìns mout ja hulpvoardeg wezen in tieden van nood. Kom, ik goa eerst nog even noar mien Griet veurdat ik noar mien les goa. Tjeu…”

Buurman Jan haar t ter mor drok mit. Grieperij haar hom in zien greep kregen. Ik mos onwillekeureg denken aan ‘DE GREEP’. n Stomme film van acht menuten uut 1909: d’eerste Nederlandse horrorfilm ooit. n Film over n overspeulege vraauw.

Grìnsoverschriedend gedrag in 8 menuten. De griezel lopt joe over de graauwel…..