Overaal heur je om joe tou dat wie wìnnen mouten aan t ‘nije normoal’. Dij nije normaliteit wordt zo voak verkondegd en aanprezen dat je der abnormoal van worden. Je kinnen deur aal dij lockdowns zo stoadegaan naargens meer noar tou. Behaalve as je bie lu mit de zgn. vitoale afferen heuren. Alhouwel: dij knooien zok volgens aigen zeggen dood.

In de deur alle politisi aangeprezen anderhaalvemeter-moatschoppij, dou je as eerboare oldere veur gain meter meer mit. Je maggen dammeet vast nait meer veur poelegrap en oardeghaid mit traain of bus, omdat je gain ‘prioriteit’ binnen. Tegenwoordeg doun ìnkeld de twij S-n dertou: sievers en statistieken. Tot sekuur achter de kommoa. En ook t gevoar van n appkedemie zit in de locht, of zo as dat tegenwoordeg hait: in de cloud. Nou in dij cloud bin je as oldere niks meer as locht.

Wellicht dat ze joe nog wat in de reken hebben as je thuus zulfgeknuterde anti-sputter- en spijlappen naaien. Want as t veurjoar lokt begunnen bie elk d’hormonen vast weer te jeuken.

Traauwens: in ons laand schient elk viroloog te wezen. t Jonkgoud begunt zok te ruiren, net as middenstanders, gastronomen en beursgenoteerde bedrieven. Ze willen aalmoal weer uutbundeghaid en tralalala hopsasa. t Vertraauwen in en de geleufwoardeghaid van politisi slieten as zolen van haardlopers. Net as d’adviezen veur t in acht nemen van t gezonde benul.

Nou ja, de scholen goan in jannewoarie wellicht weer lös. d’Oldern doarentegen mouten vast n pas op de ploatse moaken. Veur dij geldt: de tied van tuutjefloiten en vlinderknippen heurt nait meer bie t nije normoal. Veur dieverdoatsie omkeudeln wordt dammeet vervast mit hoge boutes belast. En wat te denken van joen sexleven. Ik heb heurd dat ter al hail wat manlu rondlopen mit stresstiekels. Je kinnen op n achteròf stee meschain nog siddeln, tiepeln of n spultje doun as hok-stok-blokken.

En ik?

Och, ik mout nait veul hebben van olle spullechies as Okkerdebok mit hoaneveren, koeltjestoiten of petjerollen. Wat zeggen ie: kaaichiebakken?

Oh, dat zit wel goud. Ik heb zulf n kaaichie en dij bakt mie op dit mement n aaichie…..