“Wat vinst van mien nije schounen?”

Buurman Jan legde n bain op d’hörn van keukentoavel en keek mie groots aan. “Echte Kroks mit extroa dikke zolen. Dij heb k kommen loaten via AliExpress. k Heb lestdoags lezen dat Grunnegers aal körter worden. De gemiddelde lengte van n Grunneger man is op t heden 184,5 sentimeter. Knabbe koppen hebben dat veur mie uutrekend most waiten. Nou, dat is wel even sikkom n haalve sentimeter körter as tien joar leden. Körtom, de Grunneger man krimpt. De grui is deruut. En ik wil wel geern over mien Griet hìn kieken.”

“En heur op kop spijen? Nou, doar kin k mie wel wat bie veurstellen. Veurdast ter op verdocht bist zugt dien Griet die nait meer stoan en lopt ze over die hìn. n Man zo as doe mout netuurlek wel tot “de groten” rekend worden,” nittjede ik.

“Krek,” zee buurman Jan. “Mor ehh…., ik goa gaauw noar mien Griet. Ik wil heur even konfrontaaiern mit t faait dat ik nou n grode Grunneger bin. Din bindt zai in t vervolg vast wel in. Tjeu”.

Dou buurman Jan vot was mos k denken aan aandere “grode” Grunnegers. Zogenoamde grootheden, lu mit veul grootsproak en mit veul verbeeldens.

Kiek, je kinnen wel n haile groothaid wezen willen, mor as je joezulf van aigenwiezeghaid in de neuze spijen kinnen en din ook nog noast joen Grunneger potje pizzen, din gaait onze streektoal wel noar zien grootje.

En dat zol mie ja slim begroten……..