Buurman Jan ston op de kokesmadde dij veur de deure van de keuken lag. Veur zien doun was hai aan de vrouge kaande. “Mien Griet is noar yoga”, zee hai. “Ik haar in t Dagblad lezen dat je, as je aan yoga deden, de woarneemboare mìns verbinden mit de wezenleke mìns en dat je din op zuik binnen noar joen woare oard zodat je in overainstemmen doarmit leven kinnen.”

“Oh, op dij fietse”, zee ik. “En nou hest n Griet dij zo boegzoam is as dien toenslange?”

“Nou nee, dat nait. t Is heur eerste les moust waiten”,zee buurman Jan. “Kiek, mien Griet is ja nogal star in heur doun en loaten. Doarom heb k heur overhoald om op yoga te goan. Volgens dij yogasnokkel in t artikel wor je doar inderdoad boegzoamer deur, zo as toe al vruigst. Dus ik docht dat mie dat wel pazen zol. Ik zee tegen mien Griet dat t toch wel slim vervelend was dat zai ons aaierkokertje nait meer onder uut t aanrechtkassie pakken kon. En de toonnoagels knippen was ook al tamtoatsie.

Körtom: zai het zok aanmeld en votdoadelk n yogamatje besteld bie AliExpress. Mor ja, der mos ook nog n spesioale yogatazze bie. Aans mos zai mit heur matje onder d’aarm op heur ol heugie deur t dörp, zee ze. En dat kon nait. Elk hof nait te waiten dat zai op yoga was. En omdat t n nogal swaiterge aangelegenhaid is het zai zok der ook vot mor n grode pot matjecleaner bie kocht. Zai zee dat, as je elk moal weer in t olle swait van de veurege moalen yogaen mouten, dat nait slim hygiënistisch is. En natuurlek mos der ook nog n handdoukje heer. Man, man, man…..”

“Zo, dien Griet luit ter gain gras over gruien. Dij pakde t vot professioneel aan”, zee ik.

“Joa, zo is mien Griet. As ze wat in de kop het din krigst ze t ter nait weer uut”, zee buurman Jan nusterg. “Om t boegproses te versnellen heb k heur ook nog overhoald om der n yogaraime bie te bestellen. Kiek, din is zai sneller in stoat om bieveurbeeld meer uut de zittende of stoande tangholden te hoalen. En ook de bootholden en de koiekop kin ze din intìnser beleven. Aal veur t goie doul ja.”

“Joa, dien doul begriep ik”, gooide ik der even tussendeur.

“Hol mie der over op”, zee buurman Jan vranterg. “Mien Griet mos der ook nog n kuzzen bie hebben. Zo’n yogasessie begunt elk moal mit n zittende meditoatsie, zee zai. Tja, en ze wol nait mit heur tokus koal op de vlouer zitten. En omdat heur kaalknoagels t daglicht nait zain maggen mozzen der ook nog spesioale yogazokken kommen.

Kiek, as k dat van teveuren aal waiten haar, haar k op beune wat poaltje- en baalkjederij spiekerd woarop en woaraan ze wat spinhakken kind haar. Dit kost mie twij moand AOW.”

Buurman Jan was onderhaand aan de keukentoavel beland.

“Kovvie?”, vruig ik. “t Kost hier niks……”