Tiedens d’Olympische Speulen in Japan leefden de sporters en t volk derom tou in n aigen òfgeschaarmde bubbel. d’Angst om besmet te roaken en noa n pozitieve test uutsloten te worden veur de wedstrieden was groot. Ook bie aandere sportevenementen is de bubbel n veraaiste bleken. Mor bubbels hebben we in wezen overaal. Ook bie joe in t dörp. Wat zeg ik: bie joe in de stroade vast ook.

Ie kinnen aalmoal wel t fenomeen “speulen”. Veur de mainsten van joe is t al tiedstieden leden, mor joe herinnern joe vast nog wel dat je mit school- stroat- of buurtgenoten bieveurbeeld Okkerdebok mit hoaneveren speulden. Dat dee je mainsttied in joen aigen bubbel.

Ain van de seleksiekriteria was vrouger bieveurbeeld de toal dij je spraken. Der waren lu dij in heur bubbel veuraal gain Grunnegs heuren wollen. Dij zaten mit aandern in n d’anti-platbubbel.

Kinder speulen nou netuurlek hail aans as vrouger mor ain ding is bleven: de bubbel. Ook nou wordt ter bie de poort selekteerd wèl wel en wèl nait bie ain over de drumpel komt. Bie sommegen is t veurnoamste kriterium nog aaltied “ons soort lu”. Zo’n kakbubbel kin je vast ook wel. Want des te older je worden des te meer kans is der dat je veuroordailen ontwikkeln. Òfkomst gaait bie sommegen voak boven gedrag. Uterlek vertoon gaait din boven innerleke weerden.

Antammen, rötgrommen en grootbekken binnen der aaltied al wèst. Je kinnen in joen omgeven vast wel n poar. Meschain zitten ze wel in joen aigen bubbel, omreden soms krieg je wat woar je nait om vroagd hebben. Din zit ter in joen vrunden- en femiliebubbel zo mor n aso-bubbeltje.

Nou ja, ie kinnen aaltied nog joen aigen bubbels moaken mit n brobbeltjebloasvertuut. Din kin je ook wat kakbubbels bloazen.

Gewoon om aan te geven dat ze locht veur joe binnen…..