“Alle balen op Appie. Hé Fokko, woar hevve t in de rust nou over had. Alle balen op Appie…….!” Alle speulers haren t mitkregen, mor ja, t was dudelk aan Fokko veurbie goan.

Appie was in t team de man dij t snelste runnen kon. Boetendes was hai zo rad as n wotterrödde. t Verhoal ging dat hai thuus, veur de wedstried, hoazevet achter zien hakken smeerde. Doarbie kwam nog dat hai t postuur haar van Arnold Schwarzenegger. De vraauwlu gingen letterlek en figuurlek veur hom plat. Mor ja wat wil je ook mit zo’n goddelk liggoam.

d ‘Eerste helfte was wat stroef verlopen en Appie haar nog gain doel trovven. De coach besprak in de rust de te volgen taktiek veur de twijde helfte. t Kwam der op dele dat ter over de vleugels speulen worden mos en dat Appie, dij vanwege zien behendeghaid de bienoam Vlaigende Vlo haar, t aanspeulpunt was. Dij mog over links en over rechts zien sprinten trekken.

Om onverkloarboare reden is doar niks van terechte kommen. Bie d’eerste de beste sprint dij Appie langs de liene trok stapde de grìnsrechter onverwachts t veld in om n verdwoalde bierdobbe op te pakken. Appie bounderde liek tegen hom aan en bleef veur n ogenblik sevveloos liggen.

Verder speulen zat ter veur hom nait meer in.

Fokko mos de toak van Appie overnemen. Mor Fokko was gain netuurtalent, zulfs verre van dat. De coach dee ale muite om Fokko de neudege aanwiezens te geven. Op n gegeven mement ston de coach aan de zieliene te speren. Mit baaide handen trok hai aan zien boksem op t stee woar zien snel zat en muik doarnoa vleugelbewegens mit zien aarms.

t Was elk dudelk, zulfs Fokko haar t in de goaten: ale balen mozzen over de vleugels. En inderdoad, uut de volgende aanval wer der scoord. Weer ston de coach te spinhakken. Hai zat ditmoal op tithöchte aan zien shirt te trekken.

Ook Fokko begreep t.

Tiedrekken……..