“t Is all inclusive, wie kommen niks te kört staait ter in d’avvetìnsie. En elke oavend is der swingmeziek.”

Buurman Jan zat vattien doage leden bie ons op proatstoule en vertelde in geuren en kleuren over heur aanstoande vekansie. Hai en zien Griet gingen tien doage noar (volgens buurman Jan) Sicitoalië. Doar wollen ze vieren dat ze vatteg joar leden traauwd waren.

Zien Griet haar spesioal doarveur n nij badpak kocht. n Kleureg geval mit fleurege ananasmotieven as dekeroatsie. Hai haar zulf n biepazend swimboksempie aanschaft. Aine mit bananenmotieven wol hai nait, omreden ain van dij bananen zat net aal op n maal stee. “Kiek, aan wat ter in de boksem zit zol t nait liggen,” zee hai.

Nee, hai haar n goddelk liggoam, mor hai haar gain zin in gegloep en lollege opmaarkens.

Hai kon zok ter al op verheugen. Zien Griet en hai haren mekoar doudestieds kinnen leerd op n dansoavend veur allainstoanden. Op “Buona Sera” van Luis Prima haren ze nog wat lös-vast danst, mor dou “Bei Mir Bist Du Schön” klonk waren de liggoamelke kontakten al wat intenziveerd. En bie de nummertjes van Bennie Goodman en Glenn Millar kwamen ze hailendaal “In The Mood”. “Kiek en dat soort meziek is der in ons hotel in Sicitoalië nou elke oavend.”

Buurman Jan was dervan overtuugd: veur hom en zien Griet wuir t n haile week “Swinging On a Star”.

Guster zat buurman Jan der weer. De vekansie was hail aans verlopen as dat hai en zien Griet docht haren. Der was wel n schier orkest wèst. t “Kwintet du Hot Club De France” dee elke oavend goud zien best. Mor van dansen mit zien Griet was niks kommen. Vrumde manlu mor ook vraauwlu haren t op de heupen van zien Griet veurzain. Ze konnen der zulfs snachts nait van sloapen omreden der wer om d’hoaverklap aan de deurklinke rammeld. Zai haren aal dij doagen gain oge dicht doan.

“Tja, wat n boudel ja”, zee ik. “Goa je joen bruloft vieren in Sicitoalië en din hejje gain vree. Man, man, man, wat ja n male boudel.”

“Mor mien Griet het mie wel verwìnd mit n haile schiere swaarde doemringe. Wie luipen doar op n ploatselke maarkt en veur nait aal teveul geld kreeg k der ook nog zonnent veur om mien dikke tone bie. Schier man. Joa, mien Griet wait wel wat mie toukomt.” Buurman Jan zedde zien nije, in Sicitoalië aangeschafde rooie pedde op en ging op huus aan.

Tja, as je de symbolen van de swingerswereld nait kinnen din kin je maal votkommen. Niks gain “Boogie Woogie Bugle Boy”. En al hailendaal gain “In The Still Of The Night”.

t Was “Dancing In The Dark” mit ruilseks…….