Elk het wel ain of meer plaanken in huus, mit of zunder n deurtje derveur. Meschain staait ter bie joe wel n pot pindakeze of n blik broene bonen op. Ik wil nait veul zeggen, mor ik denk dat ter bie joe nait veul meer bie op kin. Dat komt vast deur dat potje mit peren dij der ook nog tussen staait.

t Kin wezen dat sommegen van joe zulfs meer plaanken onder mekoar hebben: n bovenste, n middelste en n onderste. Traauwens: n Grunneger nuimt zo’n holten plaanke ook wel “bred”.

Nou is elk bred gain plaanke. As je bieveurbeeld op joen fietse gain sputterbred hebben din mis je wat aans as n plaanke. En as je n bred veur de kop hebben din is der zulfs gain spraoke van n plaanke of n bred. Din is der hailendaal niks van dat aal te zain. Òfgezain din van de persoon dij t betreft.

Binnen ie al zat van t gezoes over bredjederij en plankjederij?

Ach, òf en tou slagt aine de plaanke even mis of mist hom zulfs volledeg. En t is slim sneu as je in zo’n geval n beste smak moaken. As dat din ook nog op n bulde vlinten is, staait de wereld op zien kop. Dat zag je lestdoags wel tiedens de mountainbikewedstried op d’Olympische Speulen. t Was net of doar aine n smak van n balkon muik. Doar hebben veul lu zok din ook slim drok om moakt.

Nou is achteròf kommentaar geven nait zo stoer. Mien ol opoe zee vrouger aaltied: “n Grootsnoede mit n bred veur de kop en n bloaze zunder blad veur de mond kieken achteròf mainsttied n oabe in de kont.”

En inderdoad. Dat soort lu vindt overaal wat van. Ze denken zulfs ook nog road te waiten. Dij kieken as t woare deur n plaanke woar gain gat in zit. Ach, t ol mìns haar geliek. t Is voak n kwestie van de beste stuurlu.

Mor goud, ik pak nou even t kovviebred. t Is noamelk tied veur kovvie. Buurman Jan zit ter al kloar veur.

Boeten, op t balkon……