Uut nije experimenten bliekt dat honden tegenover heur boazen gain greintje dankboarhaid teunen. t Binnen verwìnde wezens op 4 poten.

De konkluzie van t onderzuik is dudelk: honden binnen ondankboar.

Elk wait dat veul daaier op d’ain of aandere konsumpsievörm op etensborden belanden. De mainste hounder, runder en swienen gruien op veur mor ain doul: de dood. Heur leven is t veurportoal van gehaktmeulens, slachterijen en bieltjesdoagen. Ainmoal doar aanbeland worden ze verhakseld tot blikvouer en broadlappen.

Nee, d’hond is doarentegen n gepriviligeerde levensvörm. Je zollen denken dat dit wel as dankboarhaid noar de boazen weerom geven wordt, mor niks is minder woar.

Alhouwel, as t knipt en weer knipt holden ze heur pootjes op. En heur traauwe ogies doun mennegain votsmelten as n iglo op n waarme dag in Alaska. Doarveur kriegen ze kost en inwonen en rumen heur boasies heur stront op. Dat leste gebeurt nait deur lu dij zulf kakkers binnen, mor dit even terziede. Dudelk is: de mainste honden beheuren tot de liggende vreters. Behaalve din as je hond binnen in China, Vietnam of Koreoa.

Uut n onderzuik, verricht deur biologen van t Konrad-Lorenz-Instituut veur Ethologie in Wenen bliekt, dat eten boven dankboarhaid teunen gaait. Dat ging zo: lu drokten op n knopke van n apperoat zodat ter vouer veur d’hond uut kwam. Doarnoa mozzen d’honden t zulfde doun: dus zok bedanken deur op t zulfde knopke te drokken, zodat ter vouer veur de lu verscheen. En wat bleek? Gain hond dij doarom gaf.

t Onderzuik staait zulfs in t waitenschoppelk magazin “Plos One”. Nou mout ik der wel even bie vermelden dat t 20 Border Collies, Berner Sennens en Golden Retrievers betrof. Onze beagle Biko zol t rezeltoat drastisch omgooid hebben. Der lag onlangs n dooie moes bie d’achterdeure. Biko zat ter mit stroalende ogen noast en keek mie aan. t Was ain en aal dankboarhaid.

Nou ja: wellicht dat ze binnenkört t zulfde onderzuik doun mor din ìnkeld mit mìnsen.

Doar binnen ook ja genog liggende vreters bie…….