Lestdoags las k dat Divali aan d’immateriële aarfgoudlieste van d’Unesco touvougd was. Dij lieste is n onderdail van t Unesco Verdrag mit as doul t Immaterieel Kultureel Aarfgoud van elk laand in koarde te brengen. Gemainschoppen, groepen en individuen kinnen t aarfgoud aanmelden.

Nou heb k as kind hail wat spullechies speuld. De deuzen mit Ganzebord, Pim Pam Pet en Houdje Wup stonden geregeld op t swilkje van de keukentoavel mor Divali was mie nait bekìnd. Ik docht dat t meschain ging om n spullechie zo as petjerollen, tiepeln en koeltejstoiten. Of sjoelen, zaklopen of spiekerpoepen. k Heb ook nog even docht aan messiesteken, omreden dat gebeurde vrouger mor is in populariteit ja aldernoarst tounomen.

Mor nee dus. Divali is n Hindoeïstisch feest dat as immaterieel aarfgoud aan de Nederlandse lieste van d’Unesco touvougd is. n Religie woarvan de mainste aanhangers in Inda wonen. Tja, wellicht dat Brahma, Vishnoe of Shiva d’aanmelden doan het, of aal drije, mor of hier nou sproake is van Nederlands Aarfgoud.

Kiek, bie de kultuur van de Piroatenmeziek en de Kezekeunegin in Bodegroaven kin k mie dat wel veurstellen. Net as Keuneginnedag en Pride Amsterdam. Ook neutenschaiten en old hollandse spullechies binnen potentsiële kandidoaten. Of zollen dij der al opstoan?

Nou ja, veur mie komt t Wotterloopbos tussen Vollenhove en Marknesse veul meer in aanmaarken. Hier kin je tientallen wotterwaarken bewondern woar vrouger kopschraabd wer over golfslag, stromen, dieken en hoavens over d’haile wereld. En dat aal in n lommerrieke omgeven vol vogelfloiterij gezoem en gesjirp. Schone stroomkes mit stiekelporren, voorntjes en salemanders leven doar in n Eldorado, net as iesvogeltjes.

Dit is nou echt aarfgoud. t Is boetendes t symbool van Nederland Wotterland. Mor vanòf d’intrede van digitoale simuloatsiemodellen heerst hier nou serene rust. t Worterloopbos zol k aanmelden veur d’Unescolieste.

Ach, woar moak ik mie ainglieks drok om. Der binnen op t heden ja veul slimmere dingen op de wereld.

Boetendes: wie hebben ja ons aigen Lichtjesfeest: Sunt Meerten…..