k Las lestdoags in t Dagblad n artikel over n vraauw uut Dresden dij heur kennis over de locht- en ruumtevoarttechnologie verwaarkt het in n vibrator. De bestoande apperoaten moaken, zo as ie waiten, nogal wat lewaai, dus het zai n stiller vertuut moakt. De techniek staait ja veur niks. Mor zo as mit zoveul digitoale toupazens is t nait ondenkbeeldeg dat ter n lekke chip in zit dij de triluren registreert en bieholdt. Wel wait woar de gegevens terechte kommen. Dit dee mie denken aan n klazzebezuik dij k ooit ais dee……..

“n Ieme, juf. En n nefie ook……!”

Chantal keek wies in t rond, omreden ook zai dee mit aan t klazzegesprek. d’Antwoorden van de kinder vlogen as ongekontroleerde drones hìnter en twìnter deur de klazze. Kinder konnen zok hoast nait bedappern. Heur emootsies wonnen t van de klazzeregels. Juf Hester was din ook stok verboasd over zoveul enthousiasme en “kennis” van de Grunneger toal.

Drijkwart van de leerlingen zat ter weliswoar veur Pait Snöt bie, mor as rasechte Grunnegse was ze slim blied mit t faait dat kinder van huus uut nog wat Grunnegs mitkregen. Alhouwel: van huus uut was ook mor betrekkelk. d’Ollu haren hier voak part nog dail aan. t Waren mainsttied d’opoes en d’opa’s dij heur klaainkinder streektoalwies muiken. Dij waren der mor wat groots op as heur klaainkind “in t plat” tegen heur olders pruit. Want “plat’ is de kwalifikoatsie dij veul olders in zo’n geval aan onze streektoal geven.

“n Mieghommel ook, hor. En wie haren òfgelopen zummer n webenust onder onze dakploaten,” ruip Tjapko. “Juf, juf, juffrouw, wie hebben thuus n vibra-TOR.” Ook lutje Eppo mengde zok in de diskuzzie en bölkde zunder zien vinger op te steken deur de klazze. “Mien moeke zegt aaltied dat dij batterijen vret. En zai hebben pluspunten zegt zai voak tegen mien pabbe.”

Dizze biedroage zörgde veur n kettenreaksie. “Mien pabbe het n vibra-FOON en dij klinkt as n klokke,” zee Jobke. “Mien moeke dut aan vibra-TRAINENS bie buurman Jan in t schuurtje,“ ruip Shanaja enthousiast. “Ons ponniepeerdje krigt fibra-PREMIUM te vreten,” zee Chantal. “Doar kin e goud van gruien, want doar zit timothee in,” kwam der nog achteraan.

De netuur kwam roemschoots aan bod. Juf Hester haar muite om heur laggen in te holden. Zai was ain van de waainege leerkrachten dij in t onderwies regelmoateg nog wat aan t Grunnegs dee. Heur Grunnegse les ging vandoage over de netuur en noast doethoamels en tudeltoantjes kwamen ook peerbieters en tieken aan bod. En de vibravarianten.

Eppo’s vibra-TOR zal wel doaneg noatrillen as zien ollu dizze biedroage lezen.

Hopelk het Tammo’s moeke nog wat batterijen in veurroad……