“Ik bin gek op n speklabbe,” zee buurman Jan lestdoags en keek mit ain oge noar zien Griet. Dat haar hai beter mor nait zeggen kind, omreden der binnen mementen dat ter sproake is van n leste druppel. En dat was nou ook t geval. Griet greep nog net nait noar n bongel.

Nou is “gek” op zich n relatief begrip. Wat d’ain gek vindt is veur n aander gewoon. Sommegen vinden t bieveurbeeld nait gek om zok lek prikken te loaten deur allerhaande pokkelschroot. n Ronge deur de navvel, deur de snikkel, neuze of tepel vinden sommegen hail normoal. De mainsten krieg je gelokkeg nait te zain. Dat is aans mit lu dij as kleurbouk deur t leven goan. Doar komt hier en doar wel wat van in beeld.

Ik vroag mie òf houveul piercings en tattoeages der op de tribune aanwezeg west binnen tiedens de EK finoalewedstried Engeland – Itoalië. En ik heb mie der over verboasd hou gek lu in d’hakken wezen kinnen as ze “supporter” worden. “Boeten zinnen” is veur sommegen zacht uutdrokt. Din zai je pas wat kloetjegedrag mit mìnsen dut. Din is t woord mìnsDOM goud te verkloaren. Din gaait t ter in n mieghommelnust veul rusteger aan tou.

Traauwens, schuuns tegenover ons wonen Tjakko en zien Geertje. Tjakko is slachter bie ons in t dörp en der wordt zegd dat hai aan zien Geertje nait genog het. In zien winkel boven de teunbaanke hangt noamelk n bordje mit n spreuk. En dat verstaarkt zien reputoatsie. Om vree te holden mit zien Geertje het hai t loos aanpakt. As je de spreuk lezen liekt t noamelk net of t nait over hom gaait. Mor intussen.

Oordail zulf mor:

Der was ais n slachter in Sloten,
dij wol zien potentsie promoten.
Hai prees mit n cliché
zien worst aan en zee:
zunder dij hejje nooit echt genoten!

As je in ogenschaauw nemen dat Tjakko deur gaait veur n vraauwlugek din is hier mor ain konkluzie meugelk.

Boetendes: elke gek het zien gebrek……..