Mainsttied struun k even deur t nijs om te kieken woar k wat over schrieven kin. Zo ook guster. En inderdoad: ik von wat en ging der ais even ontspannen veur zitten. Dou k de kraandekoppen scande was mien oge valen op t woord “Lambada”.

Mits haar k ook al t deuntje in de kop. Dij van de Frans-Braziloanse groep Kaoma. De noam van t laid verwist noar de gelieknoamege Zuud-Amerikoanse dans. Ie hebben dat vast wel op joen “haarde schieve” stoan, net boven d’ogen. Mor tougliekertied ston ook de televizie aan en dat was vervast de reden dat mien aandacht òflaaid wer van mien veurnemen.

t Was zo ongeveer rond t oavendeten. En dat is ja t mement dat de rekloamemoakers elke dag heur handel tegen pokkelkwoaltjes uutzenden. Dat gaait van dreug vel op de kop tot aan slovve swaitvouten en van zeubranden tot aan fieterijperblemen.

Nou mout je doar netuurlek nait minachtend over doun. n Mìns is ja gain eerappel. Elk is wel gevuileg veur middeltjes tegen bieveurbeeld stieve gewrichten en zinkens in de knijen. Doartegen legden lu vrouger swoavel in heur bèrre. Aandern druigen kestanjes in de buutse. Vraauwen dij last haren van zinkens in kop druigen n mutske van taf onder heur floddermutse: n zinkentaf. Mor dizze medische hoogstandjes worden tegenwoordeg nait meer vermeld.

t Kin wezen dat t aal in t vergeetboukje terechte kommen is. Alhouwel: t liekt mie eerder n kwestie van bewust verswiegen. De reden? Vanwege de geringe winst dij mit aal dij olle huusmiddeltjes moakt wordt netuurlek. Big Pharma het gain belang bie onze opoes wiesheden.

Mor goud: ik bin oardeg òfdwoald van de Lambada.

Dou k t haile bericht las kwam der achter dat k t nait goud lezen haar. Der ston “Lambda” en nait “Lambada”. t Scheelt mor ain letter mor t is n wereld van verschil: t is de noam van ain van de nijste coronamutoatsies. Dit moal n exoot uut Peru. De deskundegen hebben veur dizze variant d’elfde letter van t Griekse alfabet bruukt. Dudelk toch?

Om nog even weerom te kommen op de pokkelkwoalen…..

Buurman Jan zien swoagertjes oompie is lestdoags sturven aan n kronkel in de daarm. Hai kon van de piene hoast nait meer lopen en was doarom ook al n moal of wat valen. Hai luip de leste tied din ook slim kreupel.

Traauwens: “Lambda” schient ook n Grieks scheldwoord te wezen. t Betaikent “kreupele”.

En kreupel wil aaltied veurdansen……