Hebben ie ook al aine, lu? n Maairobot? Zo’n komputergestuurd geval veur lu dij benzine- en elektromaaiers zat binnen? Of hebben ie gain gras en is joen haim volstört mit grint, behaalve din wat bordertjes op de schaaiden. Nou, as ik mit d’hond aan de loop bin heur k ze overaal om mie tou zoemen en pruddeln. Dat leste is n leeftiedskwoaltje. As ze net uut deuze kommen doun ze oardeg stil heur waark, mor noa verloop van tied rabbelt ter vanalles.

Ach, ik mout zeggen, t is n makkelk ding. Aal meer lu schavven zok zo’n vertuut aan. t Binnen nait ìnkeld d’olden van doagen dij vanachter heur geroaniums aanschaauwen, hou of t gras kört holden wordt. Lu van alle leeftieden loaten, onderuutzakt of liggend op de drijzits, t waark doun deur zo’n robot en ze hebben der n mooie stuver veur over.

Ik herinner mie nog de tied dat je joe redden mozzen mit n steutertje. Dat waren nog ains tieden. Je konnen joen aigen maaipetronen bedìnken: je waren as t woare n maaiartiest. Je konnen elk moal zulf bepoalen of je veur kringen gingen of veur strepen of zulfs blokken. Ook kombinoatsies waren meugelk. En je zagen zo òf en tou ook nog n grashupper.

Wat n grashupper betreft: dat is mien buurman Jan ook: n moager Oarendje, n strinde. Hai het niks bie te zetten en het ook nait veul in de maauwen. Hai het nog zo’n old steutertje. Wekelks zai k hom mit n kop as n bolle wurgen op zien grasveld. n Robotmaaier zol net wat veur hom wezen, mor zien Griet vindt dat weggooid geld. Dij wil gain robotterij om t huus tou.

Vrouger pruiten ze ook al over robotter: rode botter. Net as potbotter dat summers inmoakt wer veur de zuvelfebrieken. Ie hebben der meschain onlangs nog wat van in n pot of panne gooid. De hootkwiezieners onder joe nuimen dat vast “beurre rouge”.

Traauwens: ik zag op internet dat AliBaba t ook te koop het. Dat is nait dij van de vatteg rovers en van: “Sesam open u!”

Nog even dit:

Let goud op produkten mit sesam. t Zoad bedoul ik. Der schient voak sproake te wezen van verontraainegen. Der binnen de leste tied geregeld weeromroupaksies west.

Wat zeggen ie: ie bruken dat zoad nait?

Nou ja: klont is ook zoadzoam eten…..