Guster belde buurman Jan. Hai was nogal van streek, omreden hai haar achter t net vist. Of ainglieks: hai was verneukt. Zien Griet ree nog aaltied op n ol heugie en dat begon heur slim tegen te stoan. t Was stoer trappen ondanks heur derailleur mit drij versnellens. Boetendes zat ze zok op heur gezondhaidszoadel elk moal op te vreten as der weer ains n steltje olle knaren veurbie vloog. “Dij kieken aaltied minachtend achterom”, haar ze proeld.

Körtom: der mos n elektrische fietse heer. “En”, zee hai, “ik bin gain man dij snachts vist en overdag netten dreugt. k Heb der votdoadelk waark van moakt. k Heb even struund op Maarktploatse en bin in kontakt kommen mit aine uut Knottjeburen. Noa n moal of wat hìn en weer geapp binnen wie n schiere pries overain kommen. Ik kreeg der zulfs nog n zoadeldekje bie. Via n tikkie hebben wie de koop òfrond.”

n Dudelk verhoal dus. Fietse zol de dag derop mit n boderieder bezörgd worden. En t mooiste was, de man uut Knottjeburen nam de verzendkosten ook nog veur zien reken.

Dat was nou al drij weke leden en Griet heur fietse was der nog nait. Dij verkoper haar op Maarktploatse de keudel introkken: zien account was verdwenen.

Om hom n beetje te treusten zee ik dat hai nait d’ainege was mit dizze ervoaren. Ik zee nog dat je gain heern roupen mouten veurdat dij in t net zit en dat t leven net n krìnnebolle is mit hier en doar n haard stokje. “Kiek, soms hejje mazzel, soms zit t tegen. t Is mor net woar of t hondje schit”, perbaaierde ik hom wat op te montern.

Ik vertelde dat gerantsies veur goie òflopen der nait binnen. Dat dat zulfs geldt veur ain van onze belangriekste grondveurzainens. “En dat betreft nait de fabrikoage van kunstgebitten”, zee ik. “t Betreft ons stroomnetwaark. t Net kin de tranzietsie noar gruine stroom dammeet nait meer aan. En din kin je zo’n elektrische fietse nait ains oploaden. Din zit je der mit verlegen.”

Buurman Jan kon mit dizze infermoatsie nait zo veul. Hai haar net van zien Griet de wind van veuren kregen om zoveul onneuzelhaid over wat hom net flikt was.

Tja, Net-FLIX hebben z’in elks geval wel. Goud veur d’òflaaiden.

Zolaank t stroomnet t aan kin teminste…….