t Is al n moand of wat leden dou k vanachter d’hege heurde. “t Is lokt.”

t Was de stem van buurman Jan dij mie even doarveur om road vroagd haar. Hai wol noamelk n bestellen ploatsen bie n Chinees. Hai haar wel ains n moandmenuutje ophoald bie de ploatselke, mor wieder kommen as babi pangang en nasi mit sjambai foe was e nooit kommen. Dat was teminste wat hai as antwoord gaf dou k vruig of hai der ook aaltied kroepoek bie bestelde.

Mor in dit geval lag t even aans.

Zien Griet kloagde de leste tied over kolle op de borst. Hai wol heur ais n moal verrazzen en omdat hai wat heurd haar over “thermocups” wol hai dij veur heur bestellen. Waarmte op de borsten kon ja gain kwoad. Dus kwam e bie mie om te vroagen woar of hai dij t veurdailegste kopen kon. t Mog nait teveul kosten. Ik ruid hom aan om t ains bie AliExpress te perbaaiern. Ik zee nog dat je doar veur n poep en n scheet terechte konnen veur aal joen negootsie.

En zo ston hai dus vanachter d’hege te vertellen dat zien bestellen lokt was. t Was n site west in t Chinees mor hai was der achter kommen dat t gewoon n kwestie was van klikjederij op t woord “cups”. Volgens hom was dat ook Chinees. Hai haar der vot mor twije van in t winkelwoagentje zet, omreden din haar zien Griet ook nog n verschonentje.

Omdat hai toch zo schier bezeg was haar hai zok der veur zokzulf ook nog n toerzak bie besteld: n fietsboksem veur op zien nije toerfietse. Hai was n stevege stamper, dus haar hai aine kozen van degelke stof. n Soort van “kont-uut-d’hoaken-toerzak”.

Guster heurde ik Jan en zien Griet aan d’aander kaant hege hikhakken. Woorden as stovvel, hampel, kounavvel en zak tamtaaierden d’aangrìnzende toenen. “Wat mout ik mit dit Chineze diggelwaark,” heurd’ik Griet bölken. “t Is ja weggooid geld, man. Wie hebben gain verlet van thermocups. Wie hebben bekers, koppen en mokken zat. Onze aanrechtkassies pulen al uut.”

t Was dudelk dat heur reloatsie nait ain van heur beste doagen beleefde. En woar Griets haart vol van was luip heur de mond nou goud van over. Tja, wat boven in de zak zit komt ter voak as eerste uut, nee din?

Nou ja, buurman Jan het ter in elks geval n toerzak aan overholden.

As t nou mor gain kat in de zak is…….