Heb je dat nou ook lu? Dat je in t Dagblad lezen dat ter weer n onderzuik west is noar de mainen van t Nederlandse volk over n zinneg of onzinneg onderwaarp en dat ie weer nait vroagd binnen?

Nou, ie leuven t woarschienlek nait, mor mie is nog nooit wat vroagd.

Op zich vin k dat nait zo slim, omreden din heb k der ook ja gain waark van, mor as d’uutkomst elk moal weer t tegenovergestelde is van hou ik derover denk din wordt mie t toch wel even dik vanachtern. Veuraal omdat mien mainen nait zoveul òfwiekt van de deursnee nuchtere noorderling.

Nou goan wie Grunnegers veur de rest van neerlands volk deur as stugge noordelingen mit n nuchter benul. Aan d’aine kaande is dat netuurlek n schiere konstateren, veuraal wat dij leste kwalifikoatsie betreft. En dij vermainde stughaid vaalt ook wel tou. Dou k gusteroavend op de golden bruloft van buurman Jan en zien Griet was, was der van stughaid noamelk hailendaal gain sproake. t Was op de dele van boer Kniepstroa ain en aal tralala hopsasa woarbie op n gegeven mement n meterslange slinger van onderboksems, tanga’s, slipkes en slagschepen knupt wer in de kleuren van n regenboge.

Ik neem aan dat ter verschaaiden lu op blode moarze op huus aan goan binnen, omreden t bruudspoar dee aan t ìnde van d’oavend elk uutgelaaide, wikkeld in d’onderboksemslinger. Dit as symbool van heur joarenlange kleurrieke laifde en t veurnemen om der nog hail wat joaren aan vast te knuppen.

Dat elk huus zien aigen kruus het was tiedens de leste òfschaaidsknuvvels goud te zain en te roeken. Ik heb der dou nog even over docht om te onderzuiken van wel welkse onderboksem was.

Ach, k heb t mor nait doan.

t Wordt mie ja toch nait vroagd…….