Wie leven in n tied dat aal meer lu in n slachtovverrol kroepen om zo d’aandacht op zok te vestegen. Doarbie verkloaren ze heur aigen standpunten, inzichten en/of gevuilens veur woar en is aal t aandere gevoarlek, verkeerd, rasistisch en/of diskriminerend.

Dat dut mie denken aan lutje Lammert. Hai was op school nait de mainst gelaifde leerling. Hai vrat van alles uut wat verboden was en luit ook geregeld zien handen wappern. Lammert kon ook meroakel goud uut de vouten mit zien bainen. As n leerkracht der wat van zee din was zien allereerste reaksie: “Ik bin ook aaltied de lul.” Tja, en dat was ook zo. Nait aaltied, mor wel mainsttied.

Voak was hai bie n akkefietje betrokken en was e weer “de lul”. Dij zulfbenuimde slachtovverrol wer op den duur zien twijde netuur. In zien wereldbeeld waren der twij soorten lu: de goien en de slechten. Hai was d’ainege goie, de rest waren aalmoal de slechten.

Wat dat betreft haar hai al vroug in de smiezen hou of de wereld in mekoar zit. Vul in stee van “Lammert” klimoat-, gender-, kultuur- of energieaktivisten in en je kreëren as zulfverkloarde goien vanzulf joen slachtovverrollen.

Körtom: “de slechten” binnen de lu dij gain aktivist binnen. Lu dij der n aandere mainen op noaholden. Lu dij kritisch binnen, in reële oplözzens denken en t gezond verstand bruken. Veul aktivisten zain dat soort lu noamelk as n gevoar en as n perbleem. Zai rechtvoardegen heur aktivistisch handeln voak mit gekleurde argumenten, aigen woarheden en/of dubbele agenda’s.

Doarbie moaken ze handeg gebruuk van t mechanisme dat slachtovvers voak begrip kriegen veur heur zulfbenuimde ellìnde. Van doaruut wordt emootsionele drok uutoefend op de “slechten”. Veur aktivisten is aandermans kommentaar din ook voak t bewies dat zai aaltied aan t körtste ìnde trekken en in heur toukomst en ontwikkeln bedraaigd of achtersteld worden. Dat ze de lul binnen.

Elk dij n aandere mainen het deugt in heur ogen nait. En as je mor voak en haard genog roupen, krieg je vanzulf n podium. “De slechten” worden vanzulf murw en/of schietensbenaauwd en duurven op n duur niks meer te zeggen.

Dij binnen din echt de lul……..