Lestdoags las k in t Dagblad n bericht dat te gek was veur woorden. Mor ja, t zol gek wezen as der gain woorden in stoan, nee din? Want din kon je nait lezen dat, as der sproake is van n emmer of n druppel, lu aal voaker griepen noar n bongel of n knuppel. Alhouwel: aal meer lu lopen mit, mor ook aal voaker in n mes.

De wereld om ons tou liekt soms wel n gekkenhuus. As je joen ogen en oren goud de kost geven kom je tot de konkluzie dat ter genog lu rond lopen dij gek in d’hakken binnen. Lu dij nog gekker binnen as gek. Dat komt nait allìnt van goudgeleuveghaid. Nee, dij hebben gain nood van gek worden, dij binnen van zokzulf al zo gek as n deure.

As mìnsen gek worden slagt t heur in de kop. Der binnen lu dij van gekhaid drifteg worden kinnen. Of ze binnen zo gek as n woagenrad. Mor hou gek je ook binnen, bedenk: t is gain gek dij t veurdut, mor dij t noa dut.

Nou mout je mit n gekkenspul nait de gek hebben vanzulf. Kiek, zo òf en tou wat gekscheerderij der tussendeur mout kinnen. En t zo nou en din ais in de gek gooien is ook nait slim. Net zo min as dat je de gek mit aine hebben. Mor paas wel op dat je nait aandermans gek worden, omreden t kin din wel ains n grode gekkenboudel worden. En ie waiten ook ja wel: aal te gek is buurmans gek. En veur je der op verdocht binnen dou je gekkenwaark.

Nou huft aal dat gek wezen nait slim te wezen. As je bievubbeld gek binnen op joen LAT-reloatsie, kin joe dat best n goud gevuil geven. Mor as je mit dit waarme weer dicht bie nkander liggen, hol de vensters din wel even dicht. Vanwege d’erotische geluden? Ach nee, tegen de nefies, ja.

Tot slöt nog even wat uut eerns en nait uut gekkens. Alles is nog nait verloren. Der is noamelk gain mins zo gek of hai het wel n goie trek.

Ik heurde buurman Jan lestdoags tegen zien wat gezedde Grietje zeggen: “Ik bin gek op n speklabbe.”

Ze waren aan t barbecueën, mor toch……