Onlangs ston der in t Dagblad n bericht over n, in d’ogen van n zekere Ouwehand, geweldege daaiernwet. Dij is deur d’Eerste Koamer zo lopiesvot even aannomen. “n Hoamerslag” hait zokswat in vakjargon. Symbolisch wuiren zunder hoamerkop even wat schilvers van t zogenoamde “haide iezer” òfklopt. De Twijde Koamer was al eerder akkoord goan, mor in ons parlementair stelsel mout de senoat der ook nog even overhìn pizzen. Vrouw Ouwehand schient nou oabetröts te wezen, mor der zit n addertje onder t gras.

Elk dij “t gevuil het” dat aargens daaiern last hebben of wat tekört kommen, kin mit dizze wettekst in d’haand noar de rechter stappen. Dij zit al kloar om d’eerste knarrielaifhebber n swien in t ies te joagen. Mor noa zien daaieronvrundelke doad wordt dij rechtspreker votdoadelk aankloagd, omreden t swienesteertje het slim te lieden had van t ieswotter. Wat zeggen ie? “n Swien zunder steertje? Dat mag ja nait.”

Inderdoad lu, dat is n doodzunde.

Op initiatief van de PvdD regelt de wet dat daaiern gain piene of ongemak meer ervoaren maggen as ze in n hok, n kaauwchie of n staal holden worden. Mor dizze wet gaait vanwege de roeme tekst ook gelden veur mien buurman Jan. Dij het n mopshondje mit d’omvang van n modde. t Daaiertje slit tiedens t lopen mit zien lief over de stroade en het doardeur dikke psychische perblemen. Dat vindt teminste Hinderk Kwak dij schuun tegenover hom woont. Zulf het dij n ainzoame Vloamse reus in n hok achter t huus. In t zulfde hok zit ook n segebokje. Dij baaident leven as kat en hond. Net as Jan en Hinderk. Of hier sproake is van n zundebok vaalt nog te bezain. Wellicht dat de rechter ook hierover n oordail vellen kin.

t Lutje wicht van Knelis en Knelske het lestdoags n goldhamstertje kregen. t Hokje was n dag eerder al uut China arriveerd. t Lutje wicht zal binnenkört wel rerend over stroade boundern. d’Hamster zulf wil noamelk n klacht indainen vanwege zien hamsterrad woarin e zok de kont nait keren kin. Tja, dij kin nou ja zien recht hoalen. Zien verblief mout volgens de wet aanpaasd wezen aan zien netuurlek gedrag. Doarbie het hai ook nog n identiteitsperbleem: hai slept as n marmot.

Der binnen ook “deskundegen” dij vinden dat alle katten noar boeten mouten. t Netuurleke jachtinstinkt vördert dat. Dat ze din geweldege slachtpartijen aanrichten onder de vogels is n kwestie van nevenschoade. Mor ie kinnen der op reken dat ter n aksiegroep komt dij t opnemt veur de vogels. Eenden mouten traauwens de meugelkhaid hebben om te zwemmen. Heur pootjes binnen der nait veur moakt om laank heur gewicht te droagen. d’Eerste eend mit n negatief zulfbeeld het zok ook al meld. Dij wil òf van t predikoat “lelke eend”.

Woar vast gainaine bie stilstaait is t faait dat ter lu binnen dij zok as baisten gedroagen. Tot nou tou beston de kans dat dij gevangenisstraf kregen, mor der is vast wel n loze gaaie van n avvekoat dij mit dizze wet in d’haand zo’n baist vrijkrigt. Je maggen baisten ja nait meer opsloeten op n stee woar ze lieden en woar ze heur netuurlek gedrag nait vertonen kinnen. Körtom, de bere is lös. Dat paast din wel weer bie dij zien netuurlek gedrag.

t Is goud dat ter moatregeln nomen worden tegen daaiernleed. Ook dat misstanden konsekwent aanpakt worden. Mor as volksvertegenwoordegers instemmen mit n wet dij, noar t liekt, praktisch onuutvoerboar is en woarvan je de konsekwentsies nait goud overdocht hebben, din bin je n kou.

Dij mouten uut t oogpunt van daaiernwelwezen wel boeten lopen.

Alhouwel, ……shit………..stikstof……