t Dagblad meldde lestdoags dat t traainverkeer lamlag. Op t mement dat k “lamlag” typde docht ik: of is t nou “lam lag”. Ach, dat kinnen ie zulf ja wel even opzuiken, nee din? In tussentied meld ik joe even dat ik nait vertellen kin wel de lamlul west is, mor t zit ter dik in dat ter nou aine bielopt as t daarde lam.

Zeker is ook dat t perbleem bie veul lu swoar op de moage lag en ligt. Dat doar lu bie binnen woarvan t haart klopde as n lammersteertje is ook wel dudelk. Reperoatsie was ja gain kwestie van n poep en n scheet. De technische dainsten lagen bliekboar nait op steutgoaren. Wellicht dat ter zulfs lu oremus haren. Der is vast wel aargens hikhakkerij west. Of ze nou weer in ain joar binnen is nog mor de vroage.

t Ligt ter in elks geval dik bovenop dat t veul kopschraberijen tot gevolg had het. t Telefoniesysteem bleek dij dag dioakenraive te wezen. Vrouger haren ze nog n tamtam om mit mekoar in kontakt te kommen, mor mennegain het doarveur gain ritmegevuil meer of kin tromrovvels nait sloagen.

In de loop van de middag kwam t spultje weer op gang. t Netwaark van telekomprovider KPN leverde noa verloop van tied weer net waark. Tja, der zaten ook ja wat tussenstations tussen: Mobirail en ProRail. Ook Nokia schient nog n voude tussen de wizzels te hebben. Veurdat alles weer op t goie spoor was ging der din ook veul tied overhìn. Rails waren ja toch nait in gebruuk en wizzelgeld was der ook nait veur handen.

Tja, de tied dat de Nederlandse Spoorwegen mit aigen raive over aigen rails ree is verleden tied. Net as overaal mos ook de NS deraan leuven: privatizeren, uutbesteden, grootschoaleghaid enz. t Binnen de teuverwoorden van d’hedendoagse bedriefsvoeren. Das ook ja veul beter veur t traainvolk.

Traauwens: k raais zulf nait voak mit traain, of beter zegd: k voar nait voak mit. As t ridt en voart is dat in mien aigen woagen.

Doar kin k soms wel lam van worden……