t Dagblad muik melden van de chaos rond de coronatesten veur boetenlandse raaizen. Lu smakbekken bliekboar om in mieghommelnusten in t boetenlaand te hopsassatralala-en en te spinhakken in bars en op dansvlouers. Doar hebben ze veul veur over. Veurdringerij en besijbelderij rond en in de teststroaten is aan d’orde van de dag.

Nou veraandern wereldwied de regels zo ongeveer per dag, dus veur poelegrap en oardeghaid vlinderknippen in n vekansieoord blift n ongewizze ondernemen. Dij regelrommelderij is netuurlek al n taiken dat de vaaileghaid betrevvende joen gezondhaid nait garandeerd is. Desondanks is t swaart van t volk bie en in de teststroaten.

Nou blieken veul teststroaten nait bepoald t keurmaark “betraauwboar” te bezitten. t Schient schering en inslag te wezen dat, zo gaauw kommersiële bedrieven geld roeken, t graaien pandemische vörmen aannemt. Bie de coronoteststroaten is dat nait aans. Ze spoiten joe in mor trekken joe n pode uut. Doar lopen hail wat gozzels rond.

Wat “betraauwboarhaid” betreft: in Duutsland is op dit mement n onderzuik goande noar de vermainde frauduleuze handel en wandel van teststroaten in t haile laand. In Keulen schient de kommersiële “dainstverlainer” 1000 testen in reken brocht te hebben terwiel der mor 70 òfnomen binnen. Leugen en bedrog tieren weleg. Zol t hier aans wezen?

Körtom: om aan raaisverkloarens te kommen legitimeert t “hongerge volk” as t woare de kriminele aktiviteiten van aal dij privoade ondernemens dij ìnkeld uut binnen op ons geld.

Ain ding is zeker: t is n kouhandel. Mit dure (deur ons betoalde) rekloamekampagnes perbaaiern ondernemens peerdje schietgeld te slachten. Mit of zunder kwantumkörten kin je terechte bie de Kwantummers en Kruudvatten van de testers. Der is keuze zat, mit de schierste noamen. Wat docht je van Spoedtest, Coronalab, Sneltestloket of HealthCheckCenters. En vergeet veuraal nait Test2Travel, Test2Fly en Teststraat. Netuurlek wel aalmoal mit .nl of .eu. Want digitoal rekent ja t makkelkste òf.

Noa wat poesterij en ströddespuilerij brengen ze joe geern n bedrag in reken en levern ze joe joen testuutslag en raaisverkloaren. Betraauwboarhaidsverkloarens duren wat langer.

Traauwens: vrouger bruukden ze ook al tèsten, zo’n stainen vuurpotje.

Dou speulden ze ook al mit vuur…