Lestdoags las k n bericht over dialekten in Duutsland. Doar is onderzöcht welke van de verschillende dialekten t mooiste is. Der binnen doar ongeveer 20 dialektgroepen. Noa n eerste seleksie bleven der 10 over en as eerste wer t Bayerisch verkozen.

t Bliekt dat wanneer lu dat dialekt heuren ze vot denken aan baargen, meren, landschoppen en lu in klederdrachten. Aal pozitieve beelden dij as pozitief ervoaren worden. Boetendes ligt dit dialekt goud in t geheur. Körtom, t ropt aal mit mekoar pozitieve gevuilens op. Zulf denk ik dat t ook komt deur dij schiere vraauwlu dij tiedens d’Oktoberfesten op heur rondborstege dainbloaden de literse bierpullen rondbrengen.

Mor goud: twijdes is t Hamburgs worden. Wel dat proaten heurt het vot de reuk van zeewotter in de neuze mit n zeeman dij deuntjes van bieveurbeeld Freddy Quinn zingt. Of “An die Nordseeküste” ook nog n rol speuld het wer nait vermeld. Ook kwam noar veuren dat uutsproaken as “Budder bei die Fische“ of „Schietwedder“ boeten de regio ook bekend binnen. En wat “schietweer” mit n zoepenlocht is waiten ze overaal, ja.

Uut n aander onderzuik (Aktuelle Spracheinstellungen in Deutschland)

kwam noar veuren dat zo’n zestg persìnt van d’ondervroagden nog geregeld dialekt sprekt. Ook gaven lu aan dat ze laifde vuilen veur en groots binnen op heur dialekt. Of dat deur richte en slichte toal komt ston der nait bie.

Wat dat leste betreft: sprekers van twij of meer toalen lieken op loatere leeftied dement te worden as sprekers van mor ain toal. Of dit ook optreedt bie regionoale meertoaleghaid is nog nait bewezen. Zeker is wel dat de toukomst van welke streektoal din ook in belangrieke moate òfhankelk is van t belaaid dat je as verantwoordelken uut stro zetten. Essentieel is in elk geval welke strategie je hantaaiern en veur welke doulgroep de gekozen aanpak de mainste levensvatboarhaid het. Zo ook veur t Grunnegs.

Onderhaand dringt de tied.

Noast proaten over olle tieden mout ter ook noadocht worden over nije zoepennappen……