Stellen ie joe ook wel ais de vroage in wat veur wereld wie ainglieks leven? Ik wel. Veuraal as k per ongelok zap langs ain van dij big brother, big diet of big tits pergrammen. t Leste songfestival is ook in ain van dij kwedelshows braiduut evalueerd.

En ook t Dagblad muik netuurlek melden van de “songcontest” in Rötterdam, inkluzief de vermainde snoeverij. t Was n groot sukses, mor wie kinnen nou weer overgoan tot d’orde van de dag, ook wat meziek betreft. Nou is t mit meziek net as mit eten en mode: nait elk proemt t zulfde. En dat is mor goud ook.

Der binnen genres bie woar ik nog gain menuut noar luustern kin. Mit rap heb k bieveurbeeld hailendaal niks. De veurnoamste reden is dat mie t milieu rond veul van dij rappers nait zint, net as veul van de vraauwonvrundelke teksten. Noamen as Boef en Droef doun de rest.

Dit borrelde noar boven dou k n bericht las over rapper Kleine. Veur de dudelkhaid: hai hait gain Lul mor Lil. Dat eerste zol e best wezen kinnen, omreden hai het zien leste scharrel n tjijs en n diedel verkocht. t Liekt ter meer op dat t n pak op pìnze was. Hai was mit heur op Ibiza en zat in ain van de luxe suites in t net nije Oku hotel. t Wicht meldde zok midden in de nacht bie de resepsie. Heur bloud droop woar t nait goan mos.

t Liekt wel of de rapwereld, mor ook de schoare volgelingen, n degenererende generoatsie oetlullen verpersoonlekt van omhooggevalen onbenullen. Toch verdainen de “betere” reveloars kappen geld, zodat ze broezen en flaneren kinnen in heur blitse bolides. Want dat is woar zai heur stoates aan verlainen: poedies en Maserati’s.

t Zol mie niks verwondern as dij Klaaine mit of zunder zien avvekoat in ain van de kommende proatshows onder de spots ploats nemt. Want elke gek dij veur n kamera zien boksem zakken let komt tegenwoordeg op tillevizie.

Ik wait nou al wat dat wordt: stereopenis. Wat dat is?

Gelul in de ruumte……..