“Hier moeten we het mee doen.” Dij woorden kwamen uut n mond van macht en onmacht. Dizze reaaksie klonk noadat ik uut de douken doan haar dat ter fraudeerd wer. “We weten het, maar dit is ons meetinstrument. Hier moeten we het mee doen.”

Ik mos aan dizze woorden denken dou k in t Dagblad las dat de wildmiegboutes halveerd waren. Net as zoveul (of alle?) boutes was dij veur n eerzoame burger, dij t nait in de boksem doun wol, veul te hoog. Ik kin mie veurstellen dat n plietsieagente t slim genant von

as zai aine mit de snikkel uut de snel betrapte. Aine dij in t duustern stroalde boven de blindenbloumen. Ook hier kwamen macht en onmacht bie mekoar. Dat nood wed breekt ging hier nait op.

Der kwam gelokkeg gain meetinstrument aan te pas om d’höchte van de boute te bepoalen. Stel joe veur dat de plietsie even meten ging houveul de koekoek der uutstak. Ik neem aan dat de boute vaststeld is aan d’haand van de gemiddelde snikkellengte in Nederland.

“Hier moeten we het mee doen. Wij als inspecteurs van het onderwijs bepalen hiermee de kwaliteit van het onderwijs op uw school.” Zai vertrok gain spier mor toch vernam k wel dat d’opdracht dij ook dizze inspektrice van t ministerie van onderwies mitkregen haar heur ook nait zinde. Zai gaf indirekt tou dat ter mit toetsscores kraiveld wer.

Hieruut bleek mor ains weer dat ter veul te veul lu op pad binnen dij tegen beter waiten in rampzoalege opdrachten van managers en boazen uutvoeren mouten. Mor d’angst om der wat van te zeggen is groot. As je t wel doun is t goud meugelk dat joen toukomst n aandere richten aannemen gaait. Boetendes, zol t wat helpen? Elk wait ja dat, as je n mieg-op-bèrre votsturen, je n schiet-op-bèrre weerom kriegen. Boetendes: wat helpt floiten as t peerd nait miegen wil.

Traauwens, wat onze toukomst betreft: mien oog vuil net nog op n grode kop mit dikke swaarde letters: “Dood aan de joden”. De hetze tegen de jeuden bliekt zörgwekkende vörmen aan te nemen, ook in ons laand. Tja, woar ain hond migt, miegen der meer.

Nooit meer!

Niks zeggen, gewoon swiegen………?