Der is tegenwoordeg hoast gain bladziede in t Dagblad woar gain rekloame opstaait. Dat geldt overegens nait ìnkeld veur t Dagblad. Overaal woar k mien ogen en oren de kost geef wor k konfronteerd mit rekloame. t Gaait mie aal meer tegenstoan, alhouwel: zunder rekloame zol der ja gain Dagblad meer wezen.

Woar k veuraal n hekel aan heb is rekloame via de telefoon. Kiek, rekloame via radio of televizie kin k tegenholden deur d’apperoaten uut te zetten. Mor t is stoer om tegen telefoonterreur òfdounde tegenmoatregeln te nemen. Zokse telefoontjes kommen, as t even tegenzit, mainsttied rond etenstied en dat allìnt al stöt mie tegen de borst.

Veurdat ik tegen zo’n filaaine mooiproater zeggen kin dat ik der op tegen bin, geft de persoon in kwestie, mien tegenhanger om zo mor ais te zeggen, al tegengas. Ik bin al zowied dat ik nait meer tegensparrel en tegensputter, want mien tegenstander aan d’aandere kaande van de liene levert din aal meer tegenstried. Boetendes, ik heb din t gevuil dat ik tegen de stroom in foksel en joe kinnen beter mitvoaren as joe der tegen verzetten, nee din?

Doarom goa k tegenwoordeg even lekker tegen de keer in. Wel beleefd, mor t wordt n soort van gevecht van man tegen man (of vraauw). Even mooi tegenappelaaiern. As dij doedel of snokkel zegt: “Mag ik u wat vragen?” zeg ik kört en bondeg: “Nee!” De tegenpartij vragt vervast woarom ik dat nait wil. Din goa ik doar rezoluut tegen in deur te zeggen dat dit n vroage is en dat ik net zegd heb gain vroagen beantwoorden te willen. En zo kin je zo’n beller schier tegenhaspeln.

As je nait bestand binnen tegen telefoonterreur kin je der aaltied nog n borrel tegenaan gooien. Dij mout je netuurlek nait tegen heug en meug opdrinken. Dat zol ja slim schaande wezen.

Mor ach, as j’alles tegen t licht holden is t ainglieks veul beter om vrundelk tegen mekoar te wezen. De mainste lu hebben doar vast niks op tegen en zellen zok doar ook nait tegen verzetten. En lu dij, tegen beter waiten in, mit de kop tegen de mure lopen, zellen der aaltied blieven.

As ze der mor gain rekloame veur moaken…….