Lestdoags muik t Dagblad melden van n onderzuik woarbie onderzöcht is wanneer je t beste van bèrre goan kinnen. t Ideoale tiedstip veur twintegers is 09:30 uur. Dattegers binnen beter uut as ze om 08:10 uur de vouten in de muilen steken. Vattegers doarentegen kinnen beter om 07:50 uur de dekens op zied gooien.

Veurdat je uut joen nust kommen mout je der netuurlek eerst opkropen wezen. Twintigers kinnen dat t beste om 01:00 uur doun, dattegers om 23:40 uur en vattegers om 23:30 uur.

Wos je dat ter n ideoal mement op de dag is veur n goie vrijpartij? Je zollen meschain denken dat dat soavends vlak veur t sloapengoan is. Mor n waitenschopper is tot aandere konkluzies kommen.

Veurdat k joe lozer moak is t goud om te waiten dat vrijen n leugenachteg ambacht is. Woarom? Nou, vrijen is zachies proaten en haardop laigen. Bedenk veuròf ook dat d’ain mit de mouder en d’aander mit de dochter vrijt.

Nou is t zo dat, as t ter van komt, de mainste lu eerst even op heur wekkertje kieken. Je mouten de tied ja in de goaten holden, nee din? Mor vergeet veuraal ook nait joen innerleke klokke. Dij geft nait veur elk dezulfde tied aan. Uut onderzuik is noamelk bleken dat twintegers t beste seks hebben kinnen om 15:00 uur, want din hebben dij heur energiepiek. Veur dattegers is dat om 08:20 uur en veur vattegers om 22:20 uur. Bliekboar is dat op de menuut òf vaststeld.

t Bliekt ook dat veul manlu smörgens rond n uur of elven tiedens heur waark wat inkakken. Vandoar dizze road: vuil rond dij tied even in joen buutse om te voesieknakken. Din zit je doarnoa weer op t hoogtepunt van joen presteren.

Veurdat je nou reageren: ook dit het onderzuik uutwezen.

Mien ol opoe haar dat, wied veurdat ter onderzuik noar doan is, al laank in de goaten. Zai bepoalde zulf heur tieden. t Vraauwvolk is ook ja boas, doar woar rook veur de wind aangaait, nee din! Zai zee aaltied: “As t joe jeukt aan kop en tonen, hejje last van joen hormonen.” Tja, en dat kin elk mement van de dag wezen.

Mocht je nou binnenkört op vrijersvouten goan, loat joen vrijer din nait aan de deurknobbe hangen. Nuig hom of heur in joen vrijerskoamertje en zörg veur n natje en n dreugje. Doar hejje vast gain vrijerspotje veur neudeg.

Nou heur k joe zeggen: “Mien tied wordt in dien epistel ja nait vermeld.”

Ach, komt tied, komt doad……