WIL(le)

Nou de doagen lengen en de temperatuur hoger wordt vinden veul lu heur dieverdoatsie weer in toene. Sommegen vinden dat n straf, mor de mainsten doun t uut vrije wil. Dij willen dat heur koopmanskaande der schier uutzugt. Doar hebben ze wille van.

Nou zit t mit de wille van ons Grunnegers wel goud. t “Grönnens Laid” wil ale Grunnegers dervan overtugen dat ter mit de wille niks mis is. Mor ik betwievel of ale Grunnegers wel n wille vast as stoal hebben.

Zo kinnen ie vast wel aine dij nait om liek wil. Of aine dij aaltied t onderste uut de kanne hebben wil. Zeker is dat doar voak hikhakkerij van komt. t Gaait ja tegen de wil van n aander in. Ter wille van de laive vree bin je zo aine din ter wille, mor as zien of heur gedrag bie de wilde knorhoanen òf is, bin je der mooi onkloar mit.

Ie kinnen vast ook wel olders dij heur kinder te veul wille geven. t Gevolg is dat dij grommen din aaltied heur wil hebben willen of zulfs heur wil opleggen willen. t Is n kwestie van opvouden, nee din. t Beste is dat, as je nait kinnen wat je willen je willen mouten wat je kinnen.

Nou binnen der lu dij zeggen dat ze de wil hebben om t goie te denken. Tja, as Beethoven ìnkeld aan muzikoale hoogstandjes docht haar, mor gain wil of zulfdiscipline had haar om zien gedachten te realizeren, was der van zien muzikoal talent niks terechte kommen.

Zo het de mìnshaid op dij menaaier nog veul meer boetengewone mìnsen veurtbrocht. t Geft aan dat, as je n staarke wil hebben, t mainsttied wel goud komt. As je der mor gain wildeboudel van moaken. Bedenk: woar n wil is, is n weg. En as dat de goie is kin je der n bult wille van hebben.

Traauwens: aandern ook…..