Elke dag kin je der wel wat over heuren, zain en/of lezen: over de vergruinen van onze moatschoppij. Boeren kinnen der boekoubouken over schrieven en ook automobilisten kinnen, noast d’epistels dij ze al hebben, alvast mit t volgende hoofdstok begunnen. Vast staait dat de pressiegroepen, mit n sjiek woord ook wel lobby’s nuimd, mit heur vergruinerij slim suksesvol binnen.

Je zollen zeggen dat ideologie de grootste driefvere wezen zol, mor ik krieg d’indrok dat geldelk gewin veurop staait. Mainsttied heur je ìnkeld de, in lobby’s van dure hotels bedochte, lyrische verhoalen over hou goud t wel veur ons is. Over wat t ons aal kosten gaait, wordt voak welbewust zwegen. Mien ol opoe zee aaltied: “Dou verstandeg. Je mouten nait touglieks heksen, slachten en Hinderk begroaven.”

Nou is t vanzulf zo dat je op ontwikkelns veuruutlopen mouten. Veuraal in n wereld woar overaal t hek van de dam is. Ik wait nait hou of joe der tegenaan kieken, mor ik heb t idee dat ter bie veul organizoatsies veul te veul wind deur d’hekken gaait. Gain wonder netuurlek. As je aandermans geld uutgeven kinnen, kin je wel royoal wezen, nee din? En vergeet ook de fanatiekelingen nait dij der mit de heksebiele op in haauwen. Sommegen zulfs mit n BEK as n heksebiele.

Der binnen ook (verstandege?) lu dij t veul te snel gaait. Dij vinden dat je nait heksen en blaauwvaarven touglieks kinnen. Lu dij vinden dat, zolaank je d’energielevern nait garanderen kinnen, je bedochtzoam mit d’elektrifiseren en t vergruinen van onze soamenleven omgoan mouten.

Wie mouten en/of willen aal meer thuus waarken, wie kinnen nait meer zunder internet, wie mouten van t gas òf en waarmtepompen mouten ons deur de winter helpen. Veurnemens zat, mor wel zit nou te wachten op n heksekedel om, as stroom uutvalen is, onze vouten in te verwaarmen.

En vergeet ook nait d’inrichten van onze netuur. t Is netuurlek geweldeg dat ter aal meer netuur komt, mor as je din konstateren dat ter aal minder netuur tougankelk wordt omdat ter hekken omtou kommen, kin je heksejachten doar wel vergeten. Mor ja, doar zit ook gainaine op te wachten. Alhouwel, der lopt vast wel n hekje perfektje rond.

Soms heb k t gevuil dat de belaaidsmoakers ons aan t heksen leren binnen. Ie waiten nait wat dat is? Nou, zunder dat je t waiten leggen ze joe twij haalmen mit n oar dwaars in de mond en trekken dij din aan.

Tja…….. zollen dat nou heksenKRENGEN wezen…….?